美國聯儲局前主席伯南克話，投資嘅最大忌，佢阿爸就領過嘢。
近排全球市場風起雲湧，難得美國聯儲局前一把手伯南克尋日喺香港演講，自然好多粉絲捧場「聽法」。
伯南克呢位國際級金融人物固然高瞻遠矚，喺演講中亦係諄諄勸喻，投資要有長遠視野。只係伯老呢個觀點恐怕唔係「家學淵源」，事關佢話佢阿爸當年喺股災先嚟賣股票。高買低賣向來都係投資大忌，連伯老嘅阿爸都係如此，只能夠講句投資真係一門高深學問。
講起個市，美國加息政策就如同一支指揮棒，伯南克又點會唔畀人問點睇！伯南克就話，如果你係前任身份評論現任聯儲局主席，人哋會點諗呢？
不過伯老補充講，佢唔估耶倫嘅算盤，但係聯儲局舊年九月冇加到息係啱嘅，事關嗰陣都好多唔明朗因素。
耶主席有伯老呢句話撐住，第日點玩加息大概會更加指揮若定啩。
余絲韻