絲絲講場：全球經濟「鞋鞋聲」解謎

S - Sovereign Crisis （主權危機）

以國家為個體概念始於17世紀，但今時今日，全球經濟、氣候變化、難民、反恐問題，根本無晒國界，既要跨國協定先解決得到，但咁各國又怕畀啲歐盟、世銀、聯合國掣肘住，各國制訂民生、經濟政策時縛手縛腳，削弱國家主權。好難平衡。

H - Hegemonic Crisis （霸主危機）

二戰以來，美國當正自己係Superman，夾硬話要維持世界秩序、領導全球經濟。但美國影響力今非昔比，近年人民幣抬頭，削弱美元領導地位，再加上各國睇住美國點經濟制裁俄羅斯，邊個仲想依賴美元。

德國一樣唔夠力鎮住歐洲。沙特阿拉伯喺中東亦失勢，事關同佢一樣大把油嘅伊朗解除制裁，可恢復輸出石油。中國崛起，雖則令南中國海區域幾咁不安，但仲未叫得上真係話晒事。

所以連「末日博士」魯比尼都講緊G-Zero，即是舊霸主衰落，又未有新霸主上到位，咁嘅真空期，唔亂至奇。

O - Oder-Neisse Treaty Crisis （國界紛爭）

奧德-尼斯河條約（Oder-Neisse Treaty）係指二戰後德國與波蘭嘅邊界協定，亦引申為各國接納二戰後所訂國界。領土穩定，至可以講經濟。

但有人仍未順氣，數得出嘅有巴勒斯坦、波斯尼亞、俄羅斯吞咗克里米亞之後同烏克蘭立立亂、中俄之間傾唔掂條界、仲有完全唔理乜嘢係界嘅伊斯蘭國（ISIS）。

E - Expectations Crisis （期望落差）

教肓普及，唔再可以單靠學歷向上流。對將來冇乜信心，自然唔想生，出生率下降，生產力跌，拖慢經濟增長，退休金回報自然達唔到預期。全球面對人口老化問題，工作人口要孭起退休人口個擔子愈來愈重（仲未明？諗吓近期激拗嘅全民退保）。下一代生活好灰？你話呢。

余絲韻