孖妹S檔案：唔怕市冧 免佣搶客
近月港股「沒有最低，只有更低」，恒指上星期連20,000點都跌穿埋，搞到孖妹一度冇晒心機，不過啲券行一於唔理個市有幾震，喺低迷嘅市況下仍出招搶客，有券商以90日免佣作招徠，對手卻以一世免佣迎戰。券商之間嘅佣金戰白熱化，最受惠自然係我哋呢啲魚缸股友。
宓：一通行政總裁 宓光輝（Louis）
一世免佣 靠客量搭夠
彩兒：你哋近日推出咗個新嘅收費計劃吸客，港股交易一世免收交易佣金，交收費就收每宗成交額嘅0.005%（最低5蚊），將收費壓到咁低，真係生存到嘅咩？
宓：我哋依家用電子交易，員工對客戶人數嘅比例為1比600，唔似以前一定要請客戶經紀，成本其實好低；只要交易量夠多係得嘅，有上萬個客就維持到個成本效益。
Kitty：你哋專做互聯網投資服務，時興講Fintech（金融創新），你哋又有咩新諗頭？
宓：依家做券行要加埋科技，正係新舊交替嘅時機，證券業唔會冇咗，但隨着互聯網嘅出現，經營模式會改變。我哋今年計劃推出一個P2P嘅借貨沽空平台，畀雙方自己喺網上協議借貨條件，我哋就喺中間收取服務費。我哋另外諗緊搞Social Trading。
彩兒：少林功夫加足球，同瀨尿蝦加牛丸變瀨尿牛丸我就聽過啫，社交加股票交易又係乜？
宓：Social Trading就係跟住另一堆人，佢買咩你就跟住買咩，呢樣嘢喺歐洲興咗幾年，應該會愈來愈流行，佢可以間接增加客戶嘅交易活動。但鑑於香港嘅證監條例，我哋唔可以照搬過嚟做，依家仲研究緊可以點推出。
淡市交易額跌逾半
Kitty：依家個市咁慘淡，你哋啲生意會唔會同個天氣一樣，進入咗寒冬呀？
宓：咁一定感受到生意受影響嘅，港股每日嘅交易額由去年四月高峰期跌咗一半有多，我哋依家嘅交易宗數比嗰陣都跌咗三成幾。不過好似食飯咁，你始終都要食飯，股市嘅交易額唔會跌到零，我哋勝在交易成本低，如果啲客要炒波幅或差價，每日賺餐叉燒飯，佢哋就會諗起我哋。淡市之中投資者會更加着重交易成本，對我哋有利。
Kitty：咁你哋今年有冇咩擴展計劃呀？
宓： 我哋起碼開兩間分行，地點會揀住宅區同樓上舖，因為想貼近群眾同減租金成本。今年主力鞏固業務，更新已有服務，同睇吓點將社交網絡結合投資市場，提升用戶體驗。
陳：耀才證券執行董事兼行政總裁 陳啟峰
一條龍投資箍住股友
彩兒：面對咁激烈嘅競爭，你哋又有咩方法留住一眾股友嘅心？
陳：除建立網上平台同平佣，我哋仲會加強產品，除咗港股、A股，仲會提供美股、日股等國際市場同埋環球期貨嘅交易服務，做到一站式投資。
Kitty：聽講你之前市況好嘅時候好積極咁擴充，呢啲計劃會唔會因市況唔好叫停（口架）？
陳：依家港股每日都有700億至800億元成交，唔算好差。市況唔好會令投資者精打細算，我哋嘅佣金相對平，係吸銀行客嘅好時機，同時租金回落亦都係增加分行嘅好機會。
料A股將再旺港股
彩兒：點解對香港金融業前景咁有信心？
陳：香港好似內地與外國嘅橋樑，A股交易額必會回升，只要將內地咁大嘅成交轉啲過嚟，港股每日成交唔排除可以上返去2,000億元。
Kitty：但近期港股跌穿二萬點，我哋都無晒心機！
陳：啲投資者雖然話好差，但其實係暗暗開心，捕捉緊入市機會，真正做投資嘅，永遠都係等平先買。依家睇淡個市已經太遲啦，應該係睇定時機入市。
郭：致富證券投資銷售部董事 郭家安（Thomas）
開錢源 標榜高質服務
Kitty：你哋嘅對手紛紛推零佣優惠，來勢洶洶，你哋會唔會跟先？
郭：我哋去年十月開始推行激活活動，搵番啲唔係太活躍嘅客戶，畀番少少優惠佢哋，好似每做夠指定數目交易，就送番啲優惠券。另外我哋最近成立咗財富管理部，做埋保險、基金、債券業務，開拓收入來源。
彩兒：人哋免佣，你哋唔減啲真係唔驚？
郭：我哋一向嘅方針都係用相宜價錢提供高質服務，唔係純靠佣金競爭，仲要有穩定系統同支援。永遠都咁平佣，一係就服務冇咁好，一係就吸客後加番價。真係有實力、有要求嘅客係咪需要零佣呢？我哋見到有錢嘅客戶唔係好志在佣金，最緊要服務好，同賺到錢，呢個解釋到點解仲有營業代表（AE），因為佢哋消息更加靈通，可收貴少少。
Kitty：咁你哋今年有咩發展大計？
郭：我哋一向都係穩定發展，上年已經增強咗交易系統，依家租金回調，有機會加開分行或者將原有嘅分行搬去更好嘅地方。我哋始終要有實體店畀客戶開戶口或者交收，但依家分行未必需要有現場客位。
鄔：富途證券行政總裁 鄔必偉
用戶多 可拓多元業務
彩兒：你哋早喺內地站穩陣腳，而且股東來頭都好勁，有騰訊（00700）、經緯投資同紅杉資本。作為中資券商嘅你哋推90日零佣優惠，驚唔驚畀人話以本傷人、引起惡性競爭呀？
鄔：長遠來說，佣金要向零的方向走，因它是上一代的產物。過去經紀可提供很多消息，但現在有互聯網可去中介化，你可以隨時得到最快最新的資訊。如果你想要投資建議，何不直接買基金。
Kitty：唔收佣，你哋又靠咩賺錢？
鄔：我們不急於賺錢，當有很多人覺得我們的軟件好用，就對收費不太敏感。當用戶數目多的時候，需求就會多樣化，現在我們只做港股及美股，但之後或可以做期貨、外匯、資產管理、基金等業務。香港有720萬人口，股民帳戶有200多萬，但上市的券商頂多只約20萬客戶，可見市場十分分散，這就是機會。
交流平台需時融入
彩兒：咁你哋個交易程式富途牛牛有咩咁特別？
鄔：我們的應用程式集股市行情、社交、交易及資訊於一身。股民一天下單的時間很少，其實很空閒，有強烈的社交欲望。我們的程式現已有過萬人在聊天，另設有朋友群組。若果有客戶想開戶，可以打開程式，召喚最近的移動營業代表前來。
Kitty：開證券戶口都可以好似叫Uber咁，都好創新，唔怪之得你哋冇咩分行啦。之不過，呢個程式過江嚟到香港，會唔會水土不服先？
鄔：我要想辦法適應香港市場。如我們來到香港，文字是繁體，我們都不會用簡體。推廣方面仍在摸索中，新一年應可做得更好。
若有料報畀彩兒同Kitty或有嘢問，可電郵money.biz@on.cc
Kitty 彩兒