港股眨眼回落至19,500點水平，唔少股份都跌到冇眼睇地步。上周五見到平保（02318）在35元關現逾八百多個買牌護航，皆因呢個位係去年末季以來的主要支持位，一旦失守，就要直望30元關。若然本周A股真係穿底，睇怕散戶血肉長城都難保「平安」﹗
早前國資委宣布，原任中糧集團董事長的寧高寧將調任中化集團董事長，原職位由中國儲備糧管理總公司董事的趙雙連出任。其實，近幾年中糧集團一直在進行業務板塊和資產整合，惟未成事已率先換將，是否其他央企更須要這位企管專才解急，不得而知，而對中糧的發展方向有冇影響，仍有待觀察。
講到中糧，已納該系之內的蒙牛乳業（02319），上周五股價跌3.9%，收報10.84元，已回落至一三年首季低位，嚟緊9至10元是○九年下半年至一三年的主要支持位，理論上點都會頂一頂，但若然呢個位都失守，就必須嚴守止蝕。
消息面方面，內地奶粉註冊制送審稿出爐，預計有逾千品牌面臨淘汰，所以上周五乳品股板塊受壓。不過，話明淘汰賽，即使最終品牌數目大減，屬國有背景、為官方悉心扶持發展的大型業者如蒙牛，如無意外在這場長途賽中最終仍是勝出者。
此外，在今年二孩政策生效之後，對乳品股板塊是一個重要提振作用，行業前景並非想像般悲觀。站在中長線角度，蒙牛仍是一隻值得關注的股份。
司慕渢