北水頭等倉：和諧汽車暫抱觀望
昨日兩地股市再大驚嚇，恒指一度下試19,500點支持，滬綜指一度逼近去年八月低位2,850點，雖然滬綜指及後扭轉跌勢，埋單升1.97%重上3,000點關，但呢期人心太虛怯，一日人民幣仍波動，金融市場仍會動盪不安。依家呢啲位短線沽落去贏面未必好高，但反彈力度亦唔會太大，真係好蝦人玩。
着手整頓金融市場
呢期大家都將焦點放在人民幣貶值同跌市，其實有單嘢都幾大單，就係e租寶非法吸存款一事，據講涉案金額高達400億元人民幣，涉及人數達數十萬人。
當內地金融市場持續震盪，企業資金鏈斷裂，類似的非法集資活動爆煲，睇怕最終金融體系還是難以獨善其身。所以有理由相信，當阿爺暫時擊退人民幣炒家之後，就會着手穩定金融市場，以避免動盪為時太久會引發骨牌效應，大家惟有再忍耐多一頭半個月，期望今季股市先跌後回穩。
昨日留意到和諧汽車（03836）逆市升4.2%，收報4.43元。還記得去年兩地股災，和諧汽車股價一度跌至2.96元，之後曾反彈上6.4元，大概是由高位11.76元回落累跌幅度的0.382便止步。
鑑於公司與騰訊（00700）及鴻海集團合作的智能汽車項目，估計要到一八年才有成效，短期缺乏重大利好支持；反之，在極端氣氛之下，再度下試低位支持的機會不能完全抹殺。若然呢浪再失守4元關，都係好漢不吃眼前虧，先行迴避，待極端超賣出現，再考慮是否伸出友誼之手。
司慕渢