Market Insight：港股暫難脫離頹勢

有位世伯昨日問，近排行過街邊找換店，人仔兌港紙牌價，點解買賣差價會係8x與12x的，差距成四十蚊人仔，係咪只想賣出唔想買入？七十有幾的世伯果然食鹽多過古勝食米，有街頭智慧亦都觀察入微。昨傍晚人行公布十二月外匯儲備3.33萬億美元，比前月流失1,079億美元，創有史以來最大減幅，亦創出超過三年新低，人仔走資情況有幾厲害，已一清二楚。

最困擾係，人仔入SDR以來，大家都感覺唔到人行曾經大手入市干預匯價，看來資本外流是外匯儲備惡化的唯一解釋。到底人行默許下，貶值可以去到乜位，無得估，但近日睇得淡的大行，已經唱緊年底人仔同港紙見一算，信不信就由你。

觸發恐慌套現潮

中資股與人民幣匯價，毫無疑問已看到信心危機雛形，尤其近八成參與者都是羊群般散戶的A股，經歷過去年中股災及粗暴救市，早成驚弓之鳥，今次阿爺要再穩定市場信心，變得更加困難。事實可見，即使機構投資者「揸莊」的港股，近日都可以跌到無晒底，泛起恐慌套現潮，中國的計劃經濟與逐步市場化的股匯市，有着本質上的分歧，面對金融維穩，日日新鮮鑊鑊不同的政策，外資講句拜拜，去搵其他睇得通透的發達市場發財好過。

嗰頭A股拉閘，中資大戶惟有落香港掟貨要錢，當港股提款機，股災後久久未見成交出現千億之數，大跌市下1,072億元成交，超過1,700隻股份見紅，恒期及國期即月加埋超過34萬張成交，賓墟咁場面，可見恐慌拋售開始出現。但都係嗰句，即使阿爺出盡十二成功力托市，港股來一個技術反彈，但一日中國經濟失速趨勢不變，單靠一個「平」字，唔足以令港股中長期脫離頹勢。

淡友睇中比亞迪

近期街上所見，新Tesla比新Jazz仲要多，昨油價飛插落到十二年新低，認真諷刺！油組國老大哥沙特去年財赤近千億美元，面前係減產托市又死，唔托任由國家珍貴資源價值變成地底泥一樣，都係死。

能源價格低企成為常態，昨日「三桶油」股價固然肉酸，跌幅達5.8至7.1%，成品油價遲早要落，國家要推新能源，全國實施環保節能條路點行落去？古勝都好想知！估值唔平的比亞迪（01211）昨狂插9.8%，近排沽空比率已經持續高企，昨成交激升至8.8億元，金額仲有三成七來自空軍，淡友點諗，唔使畫公仔畫出腸。

迅銷（06288）半場拉閘，份首季業績受去年底日本氣溫較往常為高，影響冬季產品銷情，盈利480.24億日圓，按年跌30.2%，期內收益升8.5%至5203.03億日圓，其中來自日本優衣庫（Uniqlo）事業分部收益及經營溢利分別跌0.7%及12.4%。

在大跌市之下，一向堅挺的家電股亦難幸免，海爾電器（01169）跌4.53%，海信科龍（00921）跌2.59%，國美電器（00493）則跌7.2%。事實上，以大市昨日的跌勢，家電股表現尚算精壯，反而是在本月二十二日召開股東特別大會的國美跌勢較急。

國美收購快揭盅

集團本月召開的股東特別大會，將表決是否收購大股東黃光裕的資產，根據最終協議，國美將以90.95億元收購黃光裕餘下的國美未上市資產，較最初作價112.68億元平近20%。收購完成後，根據國美一五年上半年業績和新的協議計算，國美和目標集團一五年上半年備考淨利潤總計為9.43億元人仔，備考每股盈利將增幅約3.6%。

對於是否收購大股東資產，市場意見分歧，德銀分析指，國美公布向大股東收購資產達成修訂協定，交易隱含總對價下降約19%，其中交易支付現金由22億元降至10億元，配發和發行新股份從62億股降至55億股，其他則維持不變，作價吸引，予國美「買入」投資評級及目標價1.82元。

國美現價市盈率12倍，完成收購後，國美零售門市店將增至1,791間，提升市場佔有率，並將整合全零售業務、電貿及物流等業務，估計有助提升回報。作為國美小股東，支持收購與否，最重要在二十日前完成股權登記手續，否則支持與否都無權參與投票。

古勝