絲絲講場：財圈跑手備戰渣馬

今年渣馬件跑衫乜款，聽講星期六就揭盅，件衫繼續係特步（01368）贊助，特步點可以冇人出嚟跑！特步執董兼CFO何睿博（Terry）今年落場跑埋一份，瞓身支持公司贊助嘅大賽。佢今年第一次跑渣馬，所以跑10K就夠皮嘞，佢話完成到賽事已算係破紀錄。近排有冇地獄式訓練？佢淨係話每星期跑少少，唔敢講有咩最佳戰績。唔知Terry嗰日會唔會特步Full Gear上陣化身特步大使？

講起渣馬，點可以唔提資深投資者林一鳴！佢已經跑咗19次渣馬，今年當然繼續。賽前特訓？佢唔多使，事關佢每星期跑80公里以上，即是兩個馬拉松嘅距離。佢講得輕鬆，話最緊要持之以恒喎。想野生捕獲林一鳴？佢鍾意早上跑，晨早六點左右喺港島區啲熱門練跑路線出沒。

連敬涵平常心落場跑

平日有跑開嘅，仲有AMTD證券及資產管理業務部總經理連敬涵（Kingston），今次渣馬佢跑10K。佢之前一直有練跑，「但嚟到呢個階段，仲有一個禮拜就比賽，就唔會點練，要休息吓」，又話今次「志在參與」，平常心去跑先舒服。Kingston話，今次瑞信何啟聰同招商蘇沛豐都一齊跑。

余絲韻