絲絲講場：亞股亮燈慘遇「A貨跳掣」

熔斷機制，洋人稱做「Circuit Breaker」，即係「漏電斷路掣」一個，啲電壓唔對路時，自動跳掣斷路熄機。而內地A股嘅熔斷機制，同道理，當個市升或跌5%時，就自動停市15分鐘；若升或跌7%，就直頭停市。

A股尋日就咁跳咗兩吓掣，就拉咗閘，而且仲跳得有些少「A貨」Feel，事關連跳掣都跳唔準，第一次喺5.02%先嚟跳，而第二次喺6.98%就跳咗！

南韓開市	菲律賓開市	尋日係農曆十一月廿五，《通勝》講明係「忌開市」。

市場矛頭直指中證監好事多為，搞咩熔斷機制！但畀絲絲發現咗個天機，《通勝》連尋日股市跳掣都早有啟示！

話說尋日係農曆十一月廿五，《通勝》講明係「忌開市」；「開市」者，開張做生意也，包括年頭初開始營業或開工。但係內地偏偏就要尋日開始實施熔斷，唔通真係咁靈！

最快周三「宜交易」

絲絲掀多兩本其他版本嘅《通勝》，發覺尋日點止不宜開市咁簡單，即頭係「忌交易」、「忌出貨」（即係商家不宜發貨、出貨）、「忌納財」（納財者，指購買產業、入貨、收數、收租、追債、貸款）；咁睇，真係連個「錢」字有關嘅嘢都唔好做。

《通勝》呢個啟示，今趟喺華人以外嘅地方，一樣靈驗。

話說冚世界都係尋日全年首日開市，各地交易所早上開市時幾咁喜氣洋洋。殊不知，亞股一亮燈，慘遇內地A股跳掣，亞太股市齊齊受拖累鬥黑：台灣股市收挫2.7%；日股瀉3.06%收市；南韓、馬來西亞股市全部跌多過2%；印尼、菲律賓股市全部收跌。

連洋人股市一樣受傳染中晒伏，英、法及德國股市尾段分別挫2至4%不等，而道指期貨仲跌近300點添！

跟住會點？《通勝》話今日依然「忌開市」，最快要到周三先「宜開市」、「宜交易」同「宜納財」。信不信由你。

余絲韻