Market Insight：航運業重組惹憧憬

投行圈裏面，尤其是一班buy side的基金經理，今年確實難受到極。如果全年市況唔好，個個搵唔到食尤自可，最慘情係蜑家雞見水，四、五月大時代，人人瞌埋眼都贏大鑊，當幻想緊年尾份花紅點使的時候，六、七月份市況急轉直下，稍為進取，咬住唔肯打靶的基金唔少衰到輸凸，將幾乎落袋的錢跌番晒出嚟。

由一三年底吹滬港通，回頭睇，大家其實都要有心理準備，港股會愈來愈似A股，更加情緒化，返回新興市場忽冷忽熱的形態。港股係咪大倒退？的且而確係，個個想有北水南下炒股，真係打死無怨。

A股奇事大開眼界

俗語話食得鹹魚抵得渴，今年A股的確令人眼界大開，好似粗暴救市，沽空有分「善惡」，可以過千公司集體停牌避跌，只能講係匪夷所思。早兩日有單奇聞，今年三月變身「長停公主」的中國動物保健品（00940），出通告話月初旗下一架運送過往四年財政年度文件的卡車，在司機食晏期間在河北省石家莊被盜，至今未尋回，橋段真係堅過《盜海豪情》。

呢隻股市值過百億，斷估影響唔細，到底有冇復牌逃出生天之日？古勝無水晶球預知未來，但見停牌後，先有大股東抵押股份遭入稟追債，而早兩個月七條生產線有四條被河北省畜牧獸醫局註銷生產許可證，捧場客睇怕都要有定心理準備。

中資企業另一特色，係你永遠無辦法摸清佢章法。早排恒大地產（03333）天價買灣仔收租物業，大家都未識計條數，即使中國減緊息，借錢平咗，斷估都低唔過香港商廈租金回報，啱啱恒大又同主席許家印的「鋤D會」牌友收購資產，斥資204億元人仔買下四川、青島、上海及北京等五個項目，賣方乃彤叔旗下的新世界系。

恒大狂掃貨無有怕

短短時間內，恒大同香港大孖沙買下近600億元資產，以一間負債比率極高，財政經常遭到詬病的內地發展商，還不斷向無寶不落的本地富豪旗下公司收購資產，講到底，恒大打緊偏章。有云債多不愁，欠人一千幾百仲會囉囉攣，當欠債講緊數千億，銀行同債主仲驚過你。

同以往一樣，交易唔使現兜兜，204億元人仔作價近半以發行永續債（無到期期限）予新世界（00017）及周大福企業，剩低五成大約100億元，恒大僅畀出約三成首期即29億元，就攞到五個項目所有權，現金出資等於總代價15%左右。

喺平安夜之前，參考恒大發過一批永續債，大孖沙肯收公仔紙，無疑睇中長遠息口升極有譜，對息口變化相對敏感的永續債影響有限，更重要是押注恒大唔會出事。從恒大角度，得一班富豪撐場除笨有精，正好show畀銀行賓架睇，叫佢哋唔好諗住落雨收柴。

航運業重組進入第二波，將中外運長運併入招商局集團，中國外運（00598）及招商局國際（00144）均跌，但中外運航運（00368）則升2.6%。招商局集團的資產較中外運長運大得多，業務除航運碼頭外，並包括招商銀行（03968）及房地產等，實非一般航企，故此投資者宜留意中外運兩間香港子公司的變化。

中外運具低吸價值

中外運航運只是一間小公司，與招商輪船（601872.SH）業務有重疊，故重組可能性較大，昨日上升料反映相關憧憬。反觀中外運主要業務是物流，招商局集團的物流業務不突出，雙方互補效益亦明顯較小。不過，中遠系和中海系的重組涉及資產大挪移，相反，中外運長運旗下公司沒有停牌，短期不應期望會有太大動作。

市場現時對國企重組反應由熱轉冷，事實上，兩間原本敵對的競爭對手，卻在中央撮合下走在一起未必有好結果，當年中外運與長運合併便被喻為貌合神離，現時中外運長運與招商局的重合度更不顯著，市場只會冷眼視之。

然而，就算業務不重合，若有心合作始終有幫助，例如中外運擁有物流園和倉儲，如利用招商局的地產資源，物流可借助對方的國際網絡，甚至招行的融資能力，雖然短期效果有限，惟不妨藉中外運股價下跌而趁低吸納。

古勝