絲絲講場：「衰工」7徵兆你中幾多？

1、上司唔關心你

你阿頭有冇畀你知5年內前景、畀個晉升目標你？如果佢唔關心你嘅目標、冇理你想點，份工有前途極有限。

2、做嘢一成不變

呢幾年自己喺公司有咩轉變？唔單止工作範疇，升職加薪都計埋在內，若然呢幾年乜都冇變過，可見未來亦唔覺得會有改變，咁好明顯呢份工已經冇晒前景。

3、份工冇挑戰性

每日返工覺得刻板？日日如是？連用電腦都差過讀書嗰時？咁你份工肯定太易做，一份全無挑戰性嘅工好極有限，除非你等退休、等退化，甚至係一條鹹魚，咁就另計。

4、你冇升職空間

你公司嘅工種是否過於細分？甚至一去到高管位就外聘，而冇喺內部晉升？若冇發展空間，走吧。

5、意見冇人會聽

啲同事或阿頭有冇聽你嘅意見？有冇答番你？有冇至少將你嘅意見變少少用啲啲咁？若然你一開聲就畀人掟埋一邊，好明顯留低都冇意思。

6、公司不斷縮水

公司生意點？管理層有冇鬥心？如果察覺公司本身不斷縮水愈嚟愈頹，你都無謂「磨爛蓆」喇，最好喺公司消失之前自己消失。

7、返工冇晒動力

公司每年都會評核表現，作為打工仔，每年一樣要檢查吓自己嘅士氣。如果差過開初，已經係個警號，若直頭係一路跌Watt「滑晒牙」咁，擺明份工已經去到盡頭。

余絲韻