絲絲講場：新股上市唔失禮
雖然過咗Boxing Day，節日氣氛仍濃，港交所（00388）繼續收上市紀念品，仲要係老少咸宜！有雕塑、有刺繡、仲有貨車……係模型貨車玩具，款款都可能啱你心水。
東陽送「乳源彩石」
以罕有度嚟計，東陽光藥（01558）都算大手筆，送咗一舊叫「乳源彩石」嘅稀有石頭畀港交所。唔止稀有，仲有寓意，寓意秋天收穫嘅季節咁話。肯定恨死啲石頭發燒友。
中國宇天（08230）就送咗個洪澤湖雕塑，事關佢哋公司喺江蘇洪澤縣起家。湖嘅造型？咁抽象，可以點做雕塑呢可？
嗱，為咗等大家一定睇得到嗰個係洪澤湖，所以喺湖上面係準備咗一條大船。畫公仔畫到出埋腸，仲唔明晒？
木雕碟刺繡夠詩意
承達（01568）同埋飛尚非金屬（08331）就有啲詩意，分別送木雕碟同埋刺繡；而環宇物流（08012）就同其他物流公司差唔多，送架貨車模型畀港交所，大人細路都鍾意！你又Like邊款呢？
余絲韻