絲絲講場：古董X'MAS禮物喪炒

收藏愛好者網站JustCollecting話，80年代嘅玩具如果Keep得好，有排升。點解咁升得？皆因班70、80後今時今日長大成人，想話搵番童年回憶，可惜啲玩具絕晒版，惟有上網Bid；佢哋正值壯年，賺得到又捨得使，啲「童年回憶」就咁畀佢哋炒高晒。

變形金剛公仔賺38倍

若然你細細個就已經曉得睇「變形金剛」，你阿爸阿媽當年又捨得大嗱嗱用160蚊買個Figure畀你，而你仲搵得番佢出嚟，咁恭喜晒。事關個變形金剛今時值六千幾蚊，升值足足3,800%！嗱嗱嗱，仲唔即刻多謝阿爸阿媽。

最緊要原裝盒兼新淨

仲有八三年出嗰部任天堂紅白機，家吓升值咗151%。你七九年聖誕收嗰部Sony Walkman，仲勁，升值咗250%喇。太後生冇收過？唔緊要，○一年有收過第一代iPod喇啩？當年三千零蚊，依家升到七千八百大元！

呢排《星戰》又上，係時候做嘢，擺得佢20、30年，到時仲唔哈哈哈，你仔女嘅第一桶金可能都靠佢！咪話絲絲唔提你，想炒得起，記得留番原裝盒連牌，好好呵護佢保持新淨，最好唔好拆唔好砌……吓？！

余絲韻