絲絲講場：財星老闆邊度過聖誕？

黃士心陪太座遊星洲

康泰旅行社創辦人黃士心（Jackie）呢個聖誕就揀咗去新加坡度假。半退休嘅佢樂得清閒，將公司業務彈畀大仔黃進達（Jason），自己安心同太太去旅行睇燈飾，玩到27號先返香港。

佢仲報埋佳音：就係今個月佢屋企喜事多籮籮，細女結婚、Jason做爸爸兼當選埋旅遊業議會新主席。不過呢位爺爺笑話自己「粗手粗腳」，所以唔會幫Jason湊仔，而呢個任務將會留番畀嫲嫲同Jason咁話。

咁啱，另外有位老闆直頭依家已經身在新加坡，就係太子珠寶鐘錶主席鄧鉅明。佢估計今年生意一般，所以暫時想放一放低，花多啲時間享受人生同埋陪屋企人。佢會喺新加坡玩到平安夜前夕先返香港，期間諗住同太太去環球片場，佢話聖誕節正日之後，就放完假埋位做嘢。

莊偉忠留港睇戲休息

而一田CEO莊偉忠就將會留喺香港過聖誕。佢話聖誕想休息瞓覺、同埋同屋企人去睇戲。佢早幾日睇咗《星球大戰》覺得麻麻，嫌個古仔太簡單，所以佢想搵套「有啲劇情」嘅戲睇吓咁話。佢仲想趁假期睇多幾本書，但就無Set定目標話睇幾多本。

至於金利豐證券研究部執行董事黃德几，就會放兩個禮拜假。平安夜，佢會同太太去紅館睇演唱會，而25號仲一家大細去皇朝會食Buffet，認真開心！

沈大師要趕工冇假放

不過，訊匯證券行政總裁沈振盈就冇咁寫意，沈大師話自己連聖誕都要趕好多Proposals，一日假都冇得放！

而AMTD證券及資產管理業務總經理連敬涵就慨嘆話，平時工作太忙，冇咩機會休息，諗住趁聖誕瞓番個大覺咁話。

余絲韻