孖妹Ｓ檔案：今個聖誕你估快樂定快落？

R：耀才證券市場研究部高級分析員 黃偉豪（Ravi）、黃：獨立股評人 黃思敏、蔡：中資證券公司聯席董事 蔡佑徽

港股倘再跌有個譜

彩兒：美國加息，加上油價大跌、中國經濟增長放緩呢啲因素，我驚最終真係會引發「完美風暴」。港股最近經歷完九連跌，聖誕假後會唔會再插過o架？

黃：由年頭講到年尾都係講緊美國加息，依家終於落實，消除咗不明朗因素，加上港股估值唔高，再跌空間應該有限，我對港股比較樂觀，預期恒指未來一段時間會喺22,000至25,000點之間上落。

蔡：我都唔係好驚個市，市場普遍已有加息預期，除非步伐比預期快，否則應該唔會引起太大風浪，而且我覺得A股已經見底，進入慢牛格局，唔會再急跌，喺呢個情況下，港股唔會太差，恒指假期後有望上返去23,800點樓上，不過前提係冇跌穿21,000點。

中國經濟只不過係轉緊型，其實仲係好蓬勃咁發展。大家仲係將焦點放喺製造業嘅增長，但其實依家中國經濟係由互聯網、消費同服務行業帶動。我覺得「十三五」規劃所提出嘅改革係可以一步步實施，之前中央打貪、清除場外配資等行動，將根本問題解決，成個股市會更加有規劃同健康。

耀才證券黃偉豪表示，散戶可以等一月份才再作部署。　（梁耀榮攝）	獨立股評人黃思敏表示，之前靠科網股賺到錢。	證券公司高管蔡佑徽稱，中國經濟仍在蓬勃發展。

基金或拒粉飾櫥窗

Kitty：成日話啲基金喺年尾會「粉飾櫥窗」，推高個市，我哋係咪都可以趁聖誕前後喺股場賺番啲錢？

R：依家個市係比較弱，但弱得嚟又冇咩特別因素可以再推佢落去，好似美國加息、內地經濟下行呢啲嘢都係市場已知嘅事，不過應該要等下年一月初個市先可以有較好表現。

傳統嚟講，大家會估基金為咗粉飾櫥窗，喺十二月推高個市，但我諗今年呢個機會唔高，因為個市波幅好大，港股全年上、下波幅有約8,000點，唔少基金、大戶會喺呢個波幅賺夠，冇咩必要咁做。散戶可以等一月份先再部署，嗰時焦點應該會去返內地國策，比如一號文件。

彩兒：今年「港股大時代」幻滅，由四月尾28,000幾點嘅高位下挫，去到依家唔夠22,000點，但你哋仲咁開心準備慶祝聖誕嘅，唔係真係冇損手呀嘛？

黃：我算係不過不失啦，好彩冇買錯邊，賺到去意大利同巴黎嘅旅費。我四、五月加注咗科網股，賺到啲錢，六月見個市唔多對路，除咗擔心美國加息外，仲見到A股槓桿水平同估值過高，又有希債危機，所以開始分段減持。到八月尾見冇咩做、歐元又平就去咗意大利玩，到九月尾見到恒指出現「雙底」又撈番啲優質股，十一月底就再去巴黎玩。

幸夏季止蝕轉身快

R：喺「大時代」嗰陣一定有斬獲，但之後大跌市時都有虧損，好就好在走得快，七、八月已經做止蝕，計埋全年有兩成回報，都可以過一個幾唔錯嘅聖誕。唔使蝕錢嘅關鍵係轉身夠快，以往嘅大牛或者大熊市，通常都會行一年半載，甚至幾年，但港股今年內發生晒兩件事，炒嘅方法要跟個勢而改變，假如嗰時冇走到，好多股依家都未返家鄉。

Kitty：呢年炒過咁多隻股，邊隻炒得最開心？

R：我十月份買咗中海物業（02669），原因係呢間公司做物業管理，行業未來應會有整合，前景唔錯，加上佢有中國海外發展（00688）呢個咁強嘅母企支持，佢係由母企分拆上市，街貨唔多，較易被炒上。我喺1.05元嘅價位買入，之後分批沽，最後沽貨嘅價位為1.78元，回報唔錯o架。

滙控零售股唔入流

蔡：今年波幅好大，真係好難打，我今年股票嘅回報有大約10%，比往年係少咗，主要都係靠前進控股集團（01499）、迪臣建設（08268）等半新股贏錢。我喺「港股大時代」前見啲股份估值平，已經開始買貨，可惜喺高位冇全部止賺，否則可以提高全年回報。

Kitty：半新股究竟要點炒先賺到錢o架？

蔡：太多蟹貨嘅股份升勢會受阻，所以最好揀跌市時或跌市後上市嘅新股，因為佢哋嘅蟹貨比較少，仲要市值較細、上市後企得穩招股價，同埋有一定成交量，通常有呢啲條件先升得起。

彩兒：提起聖誕，你哋又會唔會諗起啲咩投資機會？

R：以前就話「聖誕鐘，買滙豐」啫，滙控（00005）呢幾年都冇好過，冇必要追吖。早兩年我都會趁聖誕炒吓零售股，但今年中、港零售市道都唔係咁旺，同埋啲人一早都喺「雙十一」、「雙十二」掃平貨啦。

平安夜不妨炒衍品

蔡：平安夜嗰日港股開半日市，通常都會急升或者急跌，想聖誕開心吓，不妨見個市有方向就小注買啲牛熊證、期指或者窩輪做個投機。

黃：有一年嘅平安夜，望住個個同事可以提早放工，但我就要上電視台做節目，嗰時都覺得好慘。但聖誕節嗰日食飯竟然有朋友話我知睇咗個節目，令我覺得有時唔一定要做股票上嘅投資，將時間投資落唔同地方，都可以有回報o架。

投資錦囊陪你過節

孖妹見三位財金界專家今年投資咁順利，梗係要提早問佢哋攞番幾個投資錦囊做聖誕禮物啦！

黃偉豪

•人行有減息降準，中央又強調去內房庫存，內房股可睇高一線，揀股方面最好買中國海外發展（00688）、華潤置地（01109）呢啲龍頭，或者深圳控股（00604）呢啲業務集中喺大城市嘅企業

•內銀增長慢，不良貸款率及餘額雙升，未來有機會減派息，最好避開

黃思敏

•自北水南下後，港股炒法唔同晒，最緊要轉身快，唔好再諗住啲股票吓吓可以長揸

•可以重點考慮「互聯網+」概念、醫藥同環保股

蔡佑徽

•切忌高追，見股份落到啲支持位附近就開始慢慢吸納

•股票投資以半新股為主，因為蟹貨較少，但唔抽新股

•中長線投資可考慮食正國策嘅互聯網企業，包括騰訊（00700）、金山軟件（03888）及金蝶國際（00268）等

若有料報畀彩兒同Kitty或有嘢問，可電郵money.biz@on.cc

彩兒、Kitty