絲絲講場：大摩高層唱出「龍耳」心聲
又到聖誕，又到聖誕！摩根士丹利一年一度聖誕唱歌慈善籌款又嚟啦，一眾大摩高層齊齊喺ICC唱聖誕歌，場面非常熱鬧。
今年已經係大摩連續第19年支持「愛心聖誕大行動（Operation Santa Claus）」，同埋第13年舉辦「摩根士丹利董事合唱團」，搵嚟70幾位董事一齊上台，由摩根士丹利亞太區聯席首席執行官高浩灃領唱，籌到善款會捐畀聽障人士的慈善機構「龍耳」。
台上除咗一班大摩高層之外，仲有一班來自香港保護兒童會的小朋友，同埋大摩員工啲囝囝囡囡，成班小朋友同高層一齊唱聖誕歌，非常溫馨。唔止咁，唱最後一首歌嗰陣，「龍耳」的聽障人士都加入舞台，用手語獨特地「唱」出佢哋的聖誕歌。
連蛋糕拍賣籌三百萬
據聞，如果大摩一眾同事想上台獻唱，都唔係話咁易！要係同事之間籌到至少3,000元，先至有機會企係個台度。而今次合唱加埋大摩員工焗蛋糕拍賣，一共籌得300萬元，將會捐畀「龍耳」。高浩灃話，對於籌到的金額十分滿意，問佢出年會唔會喺活動加入新元素，佢話呢一年會再諗諗，搞笑咁話如果有一樣嘢要改善，應該係佢哋嘅「歌聲」，仲話想「永遠」搞落去添！
余絲韻