絲絲講場：富二代上位鬥Young！
一年將盡，過百間本港上市公司嘅CEO、董事們大執位，但一班80、90後台戲只係剛剛開始。絲絲幾日前見到霸王（01338）26歲太子爺陳正鶴「代母從軍」嘅委任通告，不期然同啲上市公司計吓數，粗略統計都有4間上市公司嘅「繼承者們」不過30歲、同埋佢哋一早已涉足公司業務，例如陳正鶴剛成年便被任命為霸王附屬嘅董事！哪些年……絲絲做緊咩呢？
謝其潤22歲做主席
敏華（01999）主席黃敏利位千金黃影影，年紀輕輕28歲，就喺今年二月升呢做執行董事，正式打開今年新一代接班人嘅紮職熱潮。不過，好快就畀全港至後生嘅上市公司主席搶晒鏡，中國生物製藥（01177）創辦人謝炳愛女謝其潤（Theresa）憑22歲之齡，正式接掌家族生意。
虎都郭漢鋒出任CEO
今年下半年，在港上市只得年半左右嘅虎都（02399）都唔執輸，派出年僅25歲嘅太子郭漢鋒，接替爸爸郭建新嘅行政總裁（CEO）之位。至日前，連霸王都搞埋年輕新氣象，趁年底宣布主席陳啟源之子陳正鶴，將代母親萬玉華出任首席執行官，26歲仔已做咗首席執行官助理多年，並早於○七年就加入集團，即剛滿18歲就被任命集團附屬霸王廣州嘅董事！
霸王陳正鶴袍金$100
總結上述幾位繼承者們嘅薪酬，不得不讚吓陳正鶴為家族生意嘅服務精神，佢每年董事袍金只收100蚊，講明呢份象徵性董事袍金，係為咗支持集團成本節約嘅計劃，果然以身作則唔係得個講字！
余絲韻