絲絲講場：天寶請人闔家統請
招緊股嘅天寶（01979），有個字佢哋主席洪光椅好着緊，就係個「家」字，仲話公司宗旨係「敬業與家」。
宿舍有家庭房夫妻房
似乎唔係齋口號，洪主席請員工，好鍾意成家咁請，佢間廠就有人三代同堂一齊幫佢打工，員工宿舍連家庭房同夫妻房都有得揀。咁嘅安排，其他內地廠好少見。
咁洪主席自己個家呢？佢位公子洪瑞德（Andrew）29歲，係公司執董兼市場總監。攞本招股書八一八，兩父子原來一齊住。唔知Andrew幾時會有置業需要，洪爸爸又會唔會幫吓手呢？
點知洪爸爸話，Andrew其實一早置咗業，只不過係仍想同阿爸一齊住咁解。聽講Andrew喺英國讀生物化學，有別於一般公司二代讀商科，洪爸爸話自己好開通，任由阿仔鍾意讀乜就讀乜。洪主席仲有位千金，未入公司幫手，佢喺香港嘅大學讀書。千金冇出外國讀，唔通又係好黐家？
上市冧巴揀創立年份
講開又講，天寶揀「01979」做上市冧巴有因由，佢哋公司正正喺一九七九年於香港成立，專製造變壓器之類，到八八年先上內地設生產基地。聽講揀呢個冧巴，係象徵當年捱騾仔開始咁一步步行到今日嘅規模。
余絲韻