絲絲講場：錦行張董High爆搶閘敲鑼

港交所溫馨提示未夠鐘

話說尋日錦州銀行掛牌十五分鐘前，張董就已經High爆似開Show，不停手舞足蹈，叫台下各位一齊歡呼。咁都未夠，佢仲心急到，未開市就已經喺9點28分搶先打鑼！全場人即刻畀佢嚇驚驚，結果搞到要港交所職員急急腳走上台嚟個溫馨提示「疊半先好打鑼」。噢，掃興添。

激情阿頭幫到股價

好多公司或多或少都有個「上市夢」，終於夢想成真，主事人情緒High好難免，絲絲明嘅。嗱，High就個個都想，尤其係股價，又High唔High得起呢？又睇過。

錦州銀行董事長張偉（圖）嫌自己興奮唔夠，叫埋台下同佢一齊High！（孫冰玉攝）	金嗓子江佩珍當日呢下敲鑼，同順客隆勞松盛由16歲講起講到有男兒淚。呢啲記憶，絲絲怕且好難抹得走。（資料圖片）	勞松盛（資料圖片）

好嘞，錦州銀行之前有貸款負面新聞纏身，香港公開發售又只係錄得4%超低認購率，要靠國際配售先可以足額上市，咁嘅情況……哈，尋日佢哋股價，可謂同張董嘅心情一樣咁跌盪，盤中價坐過山車一樣，最高上到5.3元，最低又試過跌穿招股價見4.22元。咁結果？結果首日收報5.1元，比招股價4.66元高成9.4%，成績非常唔錯，Keep到一路High。

講到公司主事人喺首掛日情緒高漲，有個記憶，絲絲睇怕呢世好難抹得走，就係今年七月上市嘅金嗓子（06896）董事長「江老娘」江佩珍嗰下霸氣敲鑼，大概畀阿江老娘嘅豪氣熱情同磁性金嗓子鎮住，公司股價全日冇潛過水，收報較招股價高5.86%！

同樣令絲絲印象深刻嘅，就係順客隆（00974）今年九月掛牌首日，佢哋主席勞松盛講起咁多年點湊大間公司，由佢16歲講起，仲感觸到落下男兒淚！嗰日順客隆股價同勞主席情緒一樣咁起伏，潛過水，但結果又上番水面，全日收報較招股價高5.2%。

話時話，有冇人不妨研究吓，公司主事人首掛當日情緒變化同股價走勢嘅關係。無厘頭？唔見得喎，好多所謂技術分析，夠好多人唔知講乜，咪一樣咁多人信。

余絲韻