昨日恒指埋單升98點收22,479點，主板成交791億元，即月期指全日高低位22,576點及22,362點，雖然高低波幅得214點，惟走勢蠱惑到極。十二月合約成交張數稍跌，去到11.5萬張。老實講，對住極無方向的短期市況，應睇定先入市，大市連跌六日，反彈兩日，市場心態開始逐漸受兩星期後聯儲局議息的因素影響，淡靜下的閃升閃跌情況，對期指玩家比較不利。
恒指10日、20日及50日線收窄到百點之內，一副待變格局，周二尾市補回三分一注淡倉，帳面輸近百點，決定唔加注亦唔止蝕，一動不如一靜實行坐住先。
John Mullen