絲絲講場：名嘴講股用齊聲色藝
「最動人時光/未必地老天荒/徬徨的高位無套現/才徬徨」咦，點解首《羅生門》唔同咗樣嘅？定啲嚟，事關啲歌詞係出自股評人之手。今時今日股評人唔止要刨數刨業績，對住Fans同散戶，仲識埋填詞兼唱歌、仲要識整糕、仲要……總之點只Talk得咁簡單。
搞Talk Show改歌詞
填得又唱得嗰位係富昌金融研究部總監譚朗蔚（Stevan），佢啱啱由一間英國基金公司過檔去富昌一個月左右。Stevan舊年已經開始搞投資Talk Show，嚟緊搞第七場。
佢啲Talk Show嘅亮點，就係佢會將啲Hit歌改吓歌詞變成股市財經嘢，仲會自己開咪唱埋，等啲Fans易吸收。好似對上一場Show，佢就將首《羅生門》改編咗首《逃生門》，諷刺七月內地股市大冧。Stevan啲Talk Show唔係免費嗰隻，都一場有近500個Fans嚟捧場o架。
整糕棟篤笑吸散戶
教整糕一樣得。前輪后郭小菱就試過搞整年糕班，邊教整糕邊加插分享投資輪證技巧，好似小班教學咁，散戶好難唔印象深刻啦。
講到Talk得，訊匯證券行政總裁沈振盈（沈大師）同銀河證券業務發展董事羅尚沛就連棟篤笑都得，兩年前佢兩個拍住上，喺九展開咗場財經Talk Show《串到盡》，未公開宣傳，啲飛已經畀Fans內部買晒，成七百幾人。聽講沈大師出年有機會再搞。
仲有豐盛金融資產管理董事黃國英，舊年直頭Talk到去伊館，賣飛都有成千五人捧場，睇佢玩I-Chalk概念。係乜？Oh Sorry，你冇睇過，好難解你知。不過咁，佢嚟緊出年六月會再搞場大型Talk Show，今次好（目及）實咪再甩。
余絲韻