絲絲講場：國產外匯Trader突然搶手
以前喺外資銀行做，不知幾咁令人羨慕，不過今時唔同往日，分分鐘畀人關心句「你嗰間未有人收信啊呵」，瑞信倫敦一炒就200個Trader（交易員），德銀、法興、渣打亦係咁裁裁裁，咪話唔提心吊膽。
入SDR交易需求大增
不過同人唔同命，上海啲銀行就缺外匯Trader缺到慌，事關人民幣等住就快入SDR個籃（即納入國際貨幣基金組織特別提款權籃子貨幣）。
聽聞招行、浦發銀行、寧波銀行都一齊搶外匯Trader，工行為咗請人留人就不惜工本另加OT費。
點解咁渴人？主要係人民幣交易多咗，操作又多咗花款（邊似以前得單向升值），但內地有牌外匯Trader只得嗰250個左右。
好多內銀交易部主管都呻，依家啲客好多外匯要搞，生意自動送上門，唔夠人用，生意白白流走，點同老細解釋先。
內地既然咁缺人，不如搵歐美畀人炒嗰班入內地搵食？去到嘅一早去咗啦！事關內銀要請老外，要向政府解釋做咩唔用本地薑。好喇，為咗生意，解釋就解釋啦，最緊要快。嗱咁一樣中伏，事關非本地薑要另外考試先可以喺內地Trade，快則半年，慢則……都係同人鬥搶本地薑算把啦。
余絲韻