年尾又到會計師公會選新一屆理事會同會長嘅時候，龔耀輝舊年競逐會長失敗後，今年索性拒絕再玩，唔再重選理事。
今屆公會選舉下月十一日舉行，龔耀輝係七個要重新再選嘅現任理事中，唯一一個唔再重選。佢喺公會理事會服務咗多年，一三年底仲做咗副主席，舊年想競逐會長，結果輸畀現任會長何超平；龔舊年年底連副會長一職都輸埋冇得做。佢意興闌珊唔再選，並唔意外。
至於今年邊個會做會長？一般慣例，係兩名現任副會長之爭。今年兩個副會長係陳美寶同張穎嫻，故新會長一定係女將！
余絲韻