絲絲講場：紐約時代廣場巧劏廣告
紐約時代廣場（嗱講多次，係紐約嗰個）係世界級地標，喺嗰度嘅外牆電子屏幕賣廣告，簡直係身份象徵，以為廣告費必然亦係世界級？未必，實情係大有大賣，細有細賣，兼且有「劏房」。
拆短條片 78萬有交易
事關紐約時代廣場其實橫跨幾條街，外牆廣告屏幕多到你數唔晒。嗰度有個8層高樓嘅廣告位，確實屬於世界級，廣告費每月1,950萬港元左右；其實仲有好多細塊啲、普通啲嘅廣告位，每個月約莫312萬港元就得。
想再筍啲？有，每個月78萬港元都有交易。點解可以78萬咁平？就係廣告公司先向大業主租個廣告位返嚟，再好似「劏房」咁「劏」出去。咪誤會，唔係將個位劏到好似郵票咁細，而係「劏時間」，將廣告片時間拆短，每條拆到10至15秒，再Loop住一日播番佢幾十次。
同天價位比，唔止個價，地理位置上確實亦真係爭成條街。直接廣告效益唔理住，就好似喺倚巒就算瞓工人房，講出嚟都係住山頂咁，型晒。有冇覺近年時常聽到話，內地乜乜企業又登陸紐約時代廣場點點點，依家明冇。
余絲韻