絲絲講場：施禮賢中文輸畀小朋友
高力國際今年九月委任咗施禮賢（Nigel Smith）做佢哋香港常務董事，咪睇呢位高力新「香港一哥」係洋人，佢其實好熟香港，事關佢呢25年嚟一直喺香港做嘢，但點解佢都冇學廣東話？咪又係「春天不是讀書天」囉。
來港25年 最叻識講「的士」
施禮賢中文識聽少少，不過講就……佢自己話至叻同講得最多係「的士」兩個字，事關個音同英文差無幾。（嗱，絲絲暗地收到風，聽講佢講「好麻煩」呢幾隻字，都講得幾精靈）。咁多年，點解唔搵個機會認真學廣東話？佢話自己初嚟香港，第二年就撞正鄧小平南巡，過幾年又九七金融風暴，大事一件接一件，好忙囉。佢又話廣東話好難學、語速又快……依家升埋職仲忙，更加冇得諗喇。仲唔係「春天不是讀書天，夏日炎炎正好眠」！
不過，佢話佢自己啲小朋友返學學到廣東話同普通話，叻過佢自己「九條街」。嗱，「九條街」呢，就係絲絲講嘅……不過咪住！「廣東話」同「普通話」呢六粒字，佢明明係用中文講嘅噃！佢真唔識定……
余絲韻