絲絲講場：碧瑤主席呻上市如上斜
街度成日會見到碧瑤（01397）嘅清潔車，皆因佢哋扎根香港成35年。無論街道、醫院定學校，都有佢哋蹤影。雖然碧瑤做咗咁多年，但佢哋其實舊年五月先上市，仲係上市公司新鮮人。
唔知係咪上市過程複雜，之後又即刻開始搞粉嶺回收中心，主席吳永康（Ben）早幾日同絲絲話，依家先發現上市原來唔係終點，而係一個開始，呢條路仲要唔係平路，係個斜坡添！Ben位阿妹，即是行政總裁吳玉群都話，上市之後好似賽跑咁要9秒9跑出！絲絲睇嚟，兩兄妹搞碧瑤上市之後，似乎都未休過未有得回氣。
連墳場都有份清潔
不過Ben就話，碧瑤做咗30幾年，都幾有滿足感，皆因由醫院到墳場佢哋都有份清潔打理。咦，咪即係，由BB呱呱落地，到最後去見上帝，人一生嘅開頭與結尾，都關佢哋事。
舊年招股超購幾百倍
絲絲返到公司呢幾日，總係畀吳主席所講「斜坡」兩個字纏繞住，點解係上斜呢？
睇番碧瑤舊年招股時，超購近430倍，主板掛牌首日，仲全日股價Keep住高過招股價1.2元水平，當日收報1.24元，較招股價高超過3%，都唔錯。唔……再睇上市至依家嘅股價走勢圖，絲絲明晒。不過，再睇真啲，其實股價最高都去過1.58元水平。點都好，絲絲祝願吳主席兄妹遇強愈強、逆流而上。仲有，股價只係浮雲，真正嘅實業係講實力嘅。
余絲韻