絲絲講場：「格格」撐中國創意
周三掛牌嘅創板股中國創意控股（08368），喺內地做節目製作嘅，趙薇都入股做佢哋基礎投資者，佢睇中咩呢可？
嗱，絲絲就收到風，聽講一切皆因趙薇同中國創意位主席楊劍識於微時，早喺「環珠格格」年代就係老友，趙薇知道老友間公司上市，所以撐。咁雲鋒基金創辦人虞鋒呢？就咁嘅，聽講趙薇同虞鋒亦好熟，所以一拍即合，虞鋒又做埋基礎投資者咁囉。
趙薇同虞鋒今次各自認購五千幾萬股，各佔股權4.5%，都只係各自拎2,106萬蚊出嚟，對比佢兩位嘅身家，真係濕碎過濕碎。不過聽講周三嘅掛牌儀式，趙薇有99.99%機會現身撐場喎。若然親身到，咁又唔同喇，又睇過。
余絲韻