絲絲講場：服飾女強人平衡Keep fit
貴為服飾王國千金、馮國經長女馮詠儀（Sabrina）早前又有喜事，剛生完細路哥，絲絲尋日見到佢，簡直眼前一亮！竟然瘦咗一大個圈，再身穿簡單利落嘅西褲套裝，sharp到呢……完全唔似生過B，唔知Sabrina有咩瘦身tips益下香港女士？
事業家庭兩不誤
Sabrina話，無論肥瘦都好，健康最緊要。佢平時做好多戶外運動，另外又有做過yoga，而飲食亦好注重。近期爆出加工肉類食品安全隱憂，佢就直言一早已經戒咗食呢類食物，總括而言，就最緊要「平衡」。
唔只運動同飲食平衡，Sabrina事業同家庭一樣兼顧得到。Sabrina早排由利邦（00891）轉咗去馮氏零售做執董，而利邦入面嘅職位，就由執董變咗非執董。
前日係利邦上市6周年，一手湊大利邦嘅Sabrina，唔知有冇感傷？Sabrina透露，唔捨得就一定有，但依家更加開心，因為依家管理嘅零售業務會睇埋利邦同集團其他零售品牌，變相好似照顧埋其他「仔女」咁。
咁講法，咪即係忙咗好多？唔知Sabrina照顧自己仔女又兼唔兼顧到？佢話，陪屋企人最緊要嘅唔係時間長短，而係質素，依家大家都好珍惜彼此相處嘅時間，反而關係變得更好。
Sabrina一方面係打理服飾王國嘅女強人，另一方面係顧家媽媽，睇嚟真係唔容易。每個人一日得24個鐘，點樣兼顧咁多？無從考究，不過，如果女士們想要學平衡之道，就真係要先從time management方面好好落工夫喇。
余絲韻