呢期上大人在控制政策消息方面，採擠牙膏的方式，唔會一次過晒冷，好似上周四結束的五中全會，只係發放咗允許全面二孩的消息，到昨日才公布《十三五規劃建議》，內容包括深化住房改革、超前布局下一代互聯網、推進股票債券發行交易改革、出台漸進式延遲退休年齡政策、合理制訂水價、實施新能源車計劃，放開電力業等競爭業務等等。簡而言之，樣樣都係大製作，顯見「十三五」內地經濟慢不得！
「十三五」建議提到要推進交通運輸低碳發展，實行公共交通優先，加強軌道交通建設，鼓勵自行車等綠色出行，並實施新能源汽車推廣計劃，提高電動車產業化水平；同時又提出拓展網絡經濟空間，支持基於互聯網的各類創新。可以預計，正面臨供大於求的傳統汽車業，在「十三五」將會透過滲入互聯網元素及新能源概念，邁向另一高峰。
提及互聯網汽車，唔可以唔提吓愛股和諧汽車（03836）。繼先前與台灣鴻海及騰訊（00700）就「互聯網+智能電動車」展開創新合作，近日又宣布與阿里巴巴就「互聯網+汽車銷售及服務」方面展開全面戰略合作。能夠有本事食兩家大孖沙的茶禮，顯見其確有過人之處。昨日該股升13.9%，收報5.9元。
補充一句，睇格局呢隻股在「十三五」必然有長足發展，但相關的合作始終須時見成效，故沾手宜抱中長線持有的心態，以免因短炒失利打擊坐貨信心。
司慕渢