東驥基金管理董事總經理龐寶林出晒名鍾意打網球，佢年年都會聯同中大EMBA網球隊邀請內地幾間著名大學EMBA嘅「過江龍」，來港參加「大中華EMBA網球邀請賽」，今年龐寶林搵前香港羽毛球代表隊「一姐」陳念慈（Amy）同佢做Partner，一齊打網球混雙表演賽，呢個星期四、五維園中央網球場有得睇。
龐寶林話，可能Amy打慣羽毛球，連打網球「扣殺」同開波亦一樣係咁勁，可以話「快、狠、準」o架。
佢今次仲請到老友兼網球發燒友胡曉明(「香港電梯大王」胡法光長子）擔任周四中午開幕禮嘉賓。嚟比賽嘅多間內地名校EMBA好多其實都係內地企業老總，所以龐寶林話研究明年舉行網球比賽之餘，同時搞埋研討會，齊齊探討吓內地經濟發展機遇，好似人民幣國際化同「一帶一路」咁，直頭一舉兩得。
余絲韻