眨吓眼，今個月十七號滬港通就一歲生日，港交所（00388）為咗慶祝呢個歷史時刻，特別舉辦咗兩個比賽畀券商參加，為滬港通打打氣。咁又係，呢排個股市日日得嗰六、七百億元成交，經紀都差啲悶到瞓着覺，趁住滬港通開車一周年，沖喜吓好！
第一個係滬股通合資格股票交易比賽，喺下周錄得滬股通股票相對成交量最高嗰頭3名券商就叫勝出。第二個就係最佳投資者教育網站比賽，顧名思義，邊個網站設計到最幫到散戶就謂之最叻叻；評判會按網站內容、用詞、方便性、圖像、設計、視像教學等準則，選出最高分數嗰三個網站，就為之贏。港交所將於滬港通一周年正日頒發獎項畀得獎者。
余絲韻