絲絲講場：網龍總部係「罰」教學校？
網龍（00777）個福州總部係架太空船，你大概已經聽過，但原來返工上咗架太空船，就即刻變返學。佢哋副董事長梁念堅（Simon）話，總部係用「校園」同埋「運動」做主題，員工之間會以「同學」相稱，絲絲仲知道佢哋會「體罰」學生，巧京京唷！
Simon話，當「同學」遲到或者做錯嘢，係唔會鬧嘅，只係罰吓個「同學」上10米高台跳吓水咁啫。冇錯，架太空船總部有泳池同埋高台跳水。Simon仲爆話，CFO任國熙（Ben）都跳過7米台(口架)！咁阿Ben做錯乜？
跳水跑10公里任揀
冇冇冇，唔係畀人罰，阿Ben話純粹試玩。佢話好鍾意公司咁玩得，啲「同學」做錯嘢除咗罰跳水之外，仲會罰跑3公里同10公里！嗱，好民主，有得自選體罰項目，但咪以為可以Hea，事關會有教練督促住「同學仔」跑嘅……
校園回憶返晒嚟？回到現實講番歲數先。Simon話加入公司後，畀「同學」笑佢拉高整體年齡，佢未嚟時，公司平均係26歲，佢「插班」後，平均變咗28歲。「關我咩事啫，我邊可以拉高咁多！」Simon仲係好唔服氣。
億六美元建「企業號」
講到呢到，乜你原來未知網龍架太空船係乜？Fine，絲絲不妨話過你知，話說網龍將福州總部大樓起到好似經典劇《星空奇遇記（Star Trek）》入面架太空船「企業號」（Enterprise）咁。點解？皆因網龍主席劉德建係個Trekkie（即是Star Trek粉絲）囉。呢架國產版「企業號」做價1.6億美元，佢哋仲畀埋錢向CBS（美國哥倫比亞廣播公司）買埋版權o架。
乜唔係「冒險號」咩？識得咁問都閱歷相當，事關當年麗的電視播時，架太空船確係譯做「冒險號」o架。
余絲韻