絲絲講場：都市麗人Bra閉有數計
你估，北方定南方嘅女性背脊厚啲？內衣股都市麗人（02298）首席財務官余振球（Philip）話你知，係北方。Philip唔係靠估，佢哋公司設立咗個「中國女士體形數據庫」，由於北方同南方女士體形唔一樣，所以北方市面上嘅Bra同南方並唔係一樣(口架)。
Philip話，公司設計師甚至會親力親為上前線賣Bra，務求搵多啲機會直接同消費者溝通。
雖然網上賣Bra有一定難度，但Philip仍然睇好網購。佢話網購消費者對價格敏感，公司大部分貨品價位大眾化，佢哋最好賣嘅Bra款亦只介乎70至120蚊人仔。
林志玲現身東莞代言
好似美國Victoria's Secret咁吸睛嘅超模內衣Show？佢哋一樣有，早前就喺東莞搞咗個。佢哋亦趁內地迪士尼概念大熱「跟機」推迪士尼內衣。咦，好想睇佢哋位代言女神林志玲着迪士尼內衣添，唔知有冇米奇Bra呢可。
余絲韻