絲絲講場：筍工王竟是黑暗帝國？

員工無用武之地

呢間公司入面人才過多，結果連測試網站某粒掣係咩色啲小學雞嘢，都係精英做，英雄無用武之地冇得發揮。成間公司都係人才，換言之太少蠢材墊底，壓力超大。

仲有呢班精英個個背景差唔多，來來去去都係出自嗰幾間大學，睇嘢一樣，興趣一樣，撞口撞面嘅同事，幾乎倒模咁，悶到呢。

又有軟件工程師話，嗰度做幾年好容易會離地，同Open Source（開放原始碼）嘅真實世界脫節。

喺嗰度做，似喺間Startup（初創公司）做，可惜係間大到無比嘅Startup，即是？即是一方面產品發布周期龜速，但另一方面手頭項目會突然無端叫停，無上訴之餘，跟過叫停項目嘅日後亦唔使諗升職。

壓力超大上位難

想上位，要睇成績，講個程式「可用性」幾高、幾咁冇Bugs（程式錯誤）？咪傻，所有量化唔到、度唔到嘅嘢，公司眼尾都唔睇。做技術嘢嘅還好，若係銷售、招聘呢啲Non-Tech工種，只會覺得自己係粒螺絲；真心相信一粒螺絲幾咁重要？恭喜你囉。

仲有，嗰度升得做管理層，未必因為識管理，可能只係好叻嘅技術人，唔知升佢哋去邊好，結果出現咗班完全唔掂嘅管理層。

Work/Life Balance（工作/生活平衡）？咩嚟？嗰度冇呢幾個字(口架)喎，事關嗰度文化係放假都返公司做嘢嘅噃。

睇到呢度，你估到係邊間公司未？

余絲韻