孖妹Ｓ檔案：網絡教炒股 Blog學多財

多粉絲密密Update炒經

偉：偉哥投資手札Blogger 偉哥

Kitty：你投資生涯係點？

巴黎認為價值投資精粹在於買平貨。

Rondy（左）及Alan話睇中方向、控制注碼同守紀律最重要。（何頴賢攝）

偉：九七年我仲係大學生，見市旺，空堂就去證券行學炒股，仲用學生貸款加積蓄嗰幾萬蚊入市炒注資概念股同窩輪，撞正金融風暴，好彩輸剩學費，如果唔係學都冇得番！一○年開始寫Blog，主因當時喺討論區分享炒股經，已經有「粉絲」，想有系統去分享，加上自己閉門炒容易主觀，咪利用個平台集思廣益。

藍籌股已有大行Follow，散戶無競爭優勢，所以我主力利用基本因素發掘質優二、三線股，每日留意披露易通告、公司網站同公司專訪報道，如果係關於盈利、派息，同埋股價敏感嘅通告都會特別留意，另由事件性驅動作投機同套利，例如賣殼概念股都會研究。

彩兒：點解你咁多粉絲嘅？

偉：我個Blog互動性強、Update得密，而且會實時分享買賣同睇法，咪吸引到人睇同留言，其實我同班網友真係三唔識七。除咗會寫自己大興趣嘅股份外，網友發問會寫文解答。港股大時代先誇張，Pageview每日有5至6萬人，嗰幾個月廣告收入多咗一倍，當時市況波動多話題，一日開兩個Posts，就算忙都好開心。

Kitty：可以分享吓你個私家倉嗎？

偉：組合投資額以近千萬元計，約七成資金作價值投資、三成投機，依家個倉以約20隻小型股為主，年內回報約75%。粵運交通（03399）係我長期愛股，佢盈利持續增長、未來一至兩年或出現估值重估，佔我組合25%；自然美（00157）目前佔5%，我喺八月公布業績前已入貨，見績優又再加注。近期賺錢最多嘅係隻永嘉（03322），因為佢中期業績好，加上年年有息派，所以喺1蚊左右大手買，一度佔組合10%，目前已經賣出70%喇。

偉哥小檔案

股齡：約18年

網誌歷史：5年

投資心法：由上市公司業績及通告發掘優質二、三線股；由事件驅動作投機與套利

會計師自學價值投資

巴：巴黎的價值投資Blogger 巴黎

Kitty：你做咗會計師幾廿年，炒股咪醒啲？

巴：雖然我讀完書就考CPA會計師資歷入行，炒股近30年，但最初只係同普通散戶一樣，聽股評家貼士入市，所以當時真係輸得好慘，後來成績好少少，但仍然跑輸通脹，直到○七年股市勁Chok，嚇到玩期指、期權嘅我投晒降，好彩翌年鑽研價值投資之父Benjamin Graham（格雷姆），即係巴菲特老師嘅書先覺悟前非，上網搵資料重新落場炒，開始喺Blog寫實戰報告，同時我都開始自學炒股術，參考價值投資高手嘅方法，刨吓香港同外國嘅投資Blog文。

寫咗7年識咗好多網友，係我寫文嘅動力，早前搞咗兩次投資工作坊，先知道有班長期「粉絲」，仲有人追睇我個Blog足足7年，好感動。我次次靈感到就要即寫，經常瞓落床又彈起身寫，不過唔會推Number，所以好趕客！

彩兒：價值投資等於長揸，咪悶到喊？

巴：價值投資精粹係買平貨，咁就要計公司內在價值，穩定嘅公司適合用淨現值（NPV）、內部回報率（IRR）估算；增長型公司就啱用股本回報率（ROE）計；公司要清算合併，就要睇資產淨值、合併後嘅資產負債表同盈利，因應唔同特性嘅公司用唔同方法計算。

個人投資目標係絕對回報，今年都實現到，目前投資組合包含19隻股份，建行（00939）佔39%、工行（01398）佔18%，另持有金利來（00533）、互太紡織（01382）等。

巴黎小檔案

股齡：近30年

網誌歷史：7年

投資心法：信奉價值投資，因應企業性質，以相應的方法，如淨現值（NPV）、股本回報率（ROE）等利用Excel計算內在價值從而揀蟀

八十後 「投機」實現理想

A：勢道行者兼八十後投機客Blogger Alan、R：勢道行者Blogger Rondy

彩兒：我知道「勢道行者」係由三個八十後成立，個個都有樓揸手，Alan仲同時係「八十後投機客」Blogger。

R：勢道行者嘅核心內容係「勢、道、術」三方面，「勢」就係把握世界宏觀大勢，了解邊個市場有機會，呢方面係我負責；「道」就即係投資心法，點樣捕捉趨勢同部署，正正係Alan強項；「術」就係決定用邊種工具最有效率，係股票、期指定係衍生工具等，呢方面係另一位Blogger Keith負責。

好多人話股票市場係零和遊戲，但我哋反而覺得資金不斷流入香港，年輕人機會處處，我哋分享投資方法同技巧畀同道中人，原意係想做大個資金池一齊玩，幫助處於二、三十歲黃金期嘅後生仔做好人生規劃，盡快達到財務自由。

A：「八十後投機客」個名似高風險，其實係講緊「機會」個「機」，依家嘅時勢，只係番工儲錢唔足以達到結婚同買樓嘅理想，所以更加要用投資觸覺捕捉機會，達到資本增值，我會分享利用技術分析及市場心理預測大市趨勢、以Excel計算出入貨價格及值博率等方法。

以前依書做投資，結果得到「血的教訓」，○八年試過輸身家，後來先發覺忽略市場心理好大鑊，我相信股市歷史往往重演，所以鑽研事件研究法（Event Study）推敲後市走勢，並善用期權防止下行風險。

ETF收息股佔六成

Kitty：Rondy○八年沽期指沽出第一桶金，Alan一一年又大翻身，究竟有乜投資秘技？

R：一定要睇中方向、控制注碼同埋守紀律，順應市場大勢做到大注贏、細注輸。我個人會自製技術指標，不過我哋試過十日線升穿二十日線就入市，相反就沽出呢個咁Hea嘅指標，其實都可以跑贏大市，睇到守紀律嘅重要性！我投資組合有60%係退休倉，主力揸收息股、公用股實物股票，避免手痕沽出，另外有部分係無定向炒指數期貨，不過置咗業就唔會滿倉。

A：現時我投資組合同樣有60%係退休倉，包括ETF（交易所買賣基金）、收息大藍籌，再用小量期權做對沖，25%用嚟短炒二、三線股維持市場觸覺，15%投資期權期指。

Alan小檔案

股齡：約8年

網誌歷史：約1年（八十後投機客）

投資心法：深信歷史會重演，鑽研事件研究法推敲後市走勢，計算值博率，嚴守止蝕紀律

Rondy小檔案

股齡：近8年

網誌歷史：約1年（勢道行者）

投資心法：曾於金管局從事經濟分析，擅於捕捉宏觀市場大勢，利用數據分析資金流向，並自製技術指標，嚴守止蝕紀律

若有料報畀彩兒同Kitty或有嘢問，可電郵money.biz@on.cc

Kitty、彩兒