Market Insight：科網股估值仍偏低

牛市大家拚命找買上去的藉口，反之，跌市落力搵唱淡的理由，最終可能都係半杯水的故事，只係用唔同角度去演繹。

上月美國非農職位爆冷遠低過預期，唱淡好易，話美國復甦動力不足已然足以，近期股市解讀方式，是今年聯儲局加息機會率急降，美金回軟，人民幣再貶值的壓力減低，結果唔止美股爆升，石油、港股、內地股市、商品貨幣統統都炒番轉頭。一句到尾，基金要買起上嚟都唔使問點解，總之錢多、貨少、沽唔落，經已夠晒理由。

內地官媒事先唱好外，人行做埋1,200億元人仔逆回購，泵水托市企圖是路人皆見，教魚缸客引頸以待的A股重開，升幅有冇令人失望？

港股調整相當溫和

唔睇恒指，單是兩隻偷步搶高的A股ETF，南方A50（02822）及安碩A50（02823）全日浸浸落，埋單跌3.4%及2.7%，多多少少感受到A股雷聲大雨點小，預先挾高的港股，在超過900隻股票插水，三桶油升勢猶如曇花一現，昨日全部回軟底下，恒指跌160點收報22,354點，調整算相當溫和。

A股升得唔夠多，炒過龍的券商股首當其衝，海通證券（06837）跌4.4%，中信證券（06030）下跌3.9%，HTSC（華泰證券）（06886）與廣發証券（01776）亦各跌1.6%及1.5%。「十一」黃金周統計數字陸續出籠，澳門旅遊局公布內地旅客按年有7.1%升幅，幾隻大濠賭股逆市向上，搵番一四年黃金周訪澳內地旅客升6.1%比對，今年增幅唔見有大改善，最大分別只係濠賭股估值比一年前平咗一截，打定輸數下，股價反而有反高潮。

早兩日已經見到黃金周內地樓盤展銷會拍烏蠅的新聞，股市插水之後，睇嚟國家隊都要多兩錢肉緊，托住個樓市唔畀佢散，至有多少機會成功保七。

昨日瑞信呼籲從內房股中食胡，原因是黃金周普遍銷售比預期差，部分主要城市衰過上半年，昨日恒大（03333）、萬科（02202）、龍湖（00960）、潤地（01109）及中海（00688）跌幅介乎1.1至2.9%。

全配售新股頻爆升

近排的「全配售」私人派對愈玩愈癲，教魚缸友目瞪口呆。昨日三隻八字頭：麥迪森酒業（08057）、亞勢備份（08290）及應力控股（08141）單日升幅介乎7至21倍，套用網民金句：「這些機會不是屬於我的！」奇怪是監管當局對呢類股份隻眼開隻眼閉，好似早兩星期登場的立基工程（08369），昨收0.85元，同掛牌首日高位14.88元相比，高位追要輸九成四，二十碗水煲埋一碗認真杰撻撻，有生之年返唔返到家鄉也是未知之數！

雖則話姜太公釣魚，願者上釣，無人用槍指頭叫你買呢類全配售明知貨源歸邊的暴動股，但愈來愈多公司選擇呢類冚埋玩的方式上市，對圍外的大部分股民，真係無乜好處。

最近，內地網上團購業兩大巨頭美團與大眾點評宣布合併，成為內地互聯網歷史上最大的O2O公司。有趣是這一場聯婚，將中國虛擬世界鬥個你死我活的阿里巴巴同騰訊（00700）聯繫在一起，一瞬間共同投資於同一公司上（還有風險投資，交易中擔當紅娘角色的風險投資公司紅杉資本）。

網龍確實值得留意

正所謂世界無永遠敵人，尤其兩間公司仲係停留持續吸納融資，不斷燒錢的階段，中國股市經歷一場股災，資本市場元氣未復，合併減低競爭，也更易討好新資金投入，也是無可厚非。事實上，合併看來也交到一加一大於二的效果，新公司據聞估值躍升至170億美元，數月前點評估還不過30億美元，合併公司正準備新一輪20億至30億美元的融資。

講咁耐，未知大家get唔get到，假如合併與大規模融資陸續實現，多少反映，就算內地經濟今日有百業待興的味道，惟資本市場對中國互聯網產業估值，仲係傾向慷慨，尤其產業龍頭。

香港有隻全力進軍網上教育的網龍（00777），講緊市值104億元，減去近29億元現金，先講緊大約10億美元，會唔低估得滯，大家不妨諗諗。

古勝