絲絲講場：送「Bra」送「雲」 五新股鬥吸睛
港交所（00388）一年有過百隻新股上市，想人家記得住都唔係易，所以揀乜送畀港交所做紀念，啲公司都好有諗頭，務求首日掛牌留個美好回憶。尋日有五隻新股上市，人頭湧湧，幾乎逼爆港交所展覽廳，佢哋啲上市贈興紀念品，有「翼」又有「雲」，有啲嘅吸睛指數，仲絕對爆燈。
絲絲見到都Wow咗出嚟嘅，係內衣股維珍妮（02199）送咗一對不銹鋼Bra「翼」。呢對鋼Bra翼，維珍妮主席洪游奕話，係搵本地藝術家用咗四個幾月精心打造而成，寓意「振翅高飛」咁話。絲絲覺得，呢對鋼「翼」如果唔係縷空嘅話，怕且會刀槍不入，個Size仲咁震撼，肯定大鵬展翅都得。
IMAX送「生招牌」
亞勢備份（08290）就送咗一舊「雲」……嘅擺設畀港交所，點解係一舊雲？呢間係備份軟件公司，嚟緊會搞雲端業務嘛，可能仲寓意埋股價高唱入雲啩。
另一隻新股IMAX中國（01970）喺世界各地都出晒名，事關自認係時下年輕人嘅，有邊個未睇過IMAX電影？唔知係咪因為咁，佢哋索性就送自己個IMAX「生招牌」擺設畀港交所。
麥迪森酒業（08057）就忠於主業，送咗支意大利紅酒，係一二年嘅Tenuta dell'Ornellaia，Label上面仲印埋祝賀詞添。
至於應力控股（08141）係做結構工程嘅，可以送啲乜做紀念品呢？Easy，就送一幅相，係佢哋公司其中一個工程項目嘅相。搞掂。
余絲韻