絲絲講場：人評App玩針對 才俊唔Buy

創投撐 估值6千萬

呢個估值6千萬嘅App都未上架，但呢幾日已經紅到爆，Well，準確啲講，應該係黑到爆。事關網民發起簽名運動，誓阻佢上架，4日已有超過7千個簽名，連演員同名模都有份。Peeple個官網、fb同Twitter，上星期仲好哋哋，尋日已經……總之絲絲搵唔到啦。搞成咁，唔知有冇嚇窒投資者呢可。

個App實情點玩法？你只要夠21歲，同有你想「評」嗰個Friend嘅電話號碼，就可以開File寫「人評」兼畀評級星星，但要用真正身份；交情分三種：私交、公事定有過一段情。

個Friend無得阻止畀你評，亦無得刪走負評；負評出街前，佢會收到通知，兼有48個鐘等你兩位自己拆掂佢；過後，負評紀錄就直到永遠。

講多句，未註冊嘅就睇唔到負評，不過一註冊咗就無得甩身。驚唔驚誹謗？你諗你。

冧巴唔準 隨時柴台

本地財金人一向行得前，佢哋又點睇？君陽證券行政總裁鄧聲興（Kenny）就話，暫時無乜興趣Download呢類人評App，除非App內所評價嘅人物同自己工作有關。不過，講到被人評，Kenny笑笑口話，最怕股友彈自己推介嘅股票冧巴唔準。

明嘅，股評人唔係神，推介十隻股票未必全部升硬，只要有一、兩隻唔升，即刻畀股友抽秤，壓力大到呢。

大華繼顯策略師李惠嫻就話，自己係Small Potato（小人物），唔覺會有人評自己，亦唔怕被人評。佢覺得呢類人評App喺香港會幾受歡迎，事關港人意見多多，又鍾意喺網上留言。個App若出，佢都會登記嚟八吓，但只齋睇，唔評人。佢覺得評價呢樣嘢好主觀，易變網絡欺凌。

講番個App，仲會唔會推？唔知呢。不過，個App嗰兩位創辦人，就肯定感受至深。咁算唔算Backfire呢可。

余絲韻