Market Insight：電訊股有買盤支持

同時，周三乃傳統港股基金的季結，睇返九月恒指累積跌824點或3.8%，創下連續五個月見紅兼十三年來最長跌浪紀錄，而整個第三季大市跌5,404點或者20.5%，揩完大大鑊，芬佬趁季結多兩錢肉緊，托返高些少粉飾吓，亦係無可厚非。

唔知係季結關係，抑或美股果然命不該絕，周三晚美股報復式反彈，道指升235點，收16,284點，夜期承接日市再挾128點，收20,920點，比現貨高水74點，十一假期內地公布九月官方製造業PMI，無市場預期咁衰，見49.8，按月微升0.1個百分點；至於調查較集中在中小企樣本的財新九月製造業PMI，雖然都仲係六年半低位打滾，但終值向上修正至47.2，無初值47咁驚嚇。

睇埋數據至落注

無論官方及私人企業調查數據，都返唔到50的擴張緊縮分界線上，但響成個中環都睇淡中港股市，一片愁雲慘霧籠罩下，無咁差實在已經可以視為好消息。踏入十月第一個交易日，睇嚟港股好大機會開番個好頭，先上返21,000點樓上，但礙於今晚美國就業數據出爐，而且好可能係聯儲局加息前的最後一或兩次重要參考，想嘗試撈底的，最好係避免孤注一擲，留番一兩注本錢睇埋今晚至郁手。

國務院頒布支持新能源和小排量汽車發展措施，對購買1.6升以下排量乘用車（佔今年首九個月整體車市六成銷量），實施車輛購置稅減少的優惠政策，實施期為十月一日至一六年十二月三十一日。此舉其實跟過往內地的白家電補貼政策一樣，算係幫到一時，但幫唔到一世，但至少可刺激細排放量汽車的換車潮，幫內地車廠加速去一去庫存。

事實上，八、九月中汽協數據經已唔錯，車股亦蠢蠢欲動多時，分析估計，是次新措施大約可刺激額外的300萬架乘用車需求。消息一出，大小車股挾到爆，長城汽車（02333）升21.4%最勁，皆因公司今年主打車款正是1500cc的H6，正正受惠於新措施，銷量大增可期。其次係吉利汽車（00175）升16.4%，東風（00489）升15.1%，廣汽（02238）升9.3%，比亞迪（01211）升6.7%，早前推介升過一浸後級級落的吉汽，終於乜仇都報晒。

轉吼汽車零件股

毫無疑問，九月內地車商去庫存表現普遍比市場預期快，平均庫存落到去大約1.7個月銷售咁上下。有報告話，因為供應吃緊，部分車款零售價甚至輕微回升。有阿爺托市政策支持，長汽、吉汽及東風等，較受惠低排新稅務安排，仲係值得睇高一線，惟周三的一輪衝鋒實在升得唔少，不妨等等，或者諗諗其他落後的零部件供應商。

假期前，內地三大電訊商宣布十月一日開始，提供按流量計價的月費套餐，並同時會將用戶剩餘用量，滾存到下一個月繼續使用的服務，此舉無疑是貫徹國家對電訊業降價同時網絡提速的要求。值得留意是，周三消息下，三隻電訊股早市插過一浸，已經見唔少買盤支持，低位拗腰大幅收復失地，聯通（00762）及中電信（00728）倒升2.7%及2.1%，中移（00941）由最多跌2.1%，收市僅微跌0.2%。

新出套餐影響細

查實降價提速的要求，市場對三大電訊商今年業績倒退，早就有心理準備，剩餘用量滾存，其實衝擊反而比減價低，試想假如用剩數據可以帶到下個月繼續用，一些每月平均用量較起伏的，或者未到上一個階梯用量的，多少都會抱住買多咗無蝕底態度，傾向保留一個較高月費高用量的計劃，在營收及現金流方面，比直接減價影響反而細。

況且今年底前，估計十月底左右，三大電訊商又有鐵塔公司分拆的消息跟尾，故消息曝光後，大孖沙反而有趁壞消息撈底的手影。

經歷四、五月港股大時代，三隻電訊股由高位累積跌幅實在有跌過龍的味道，聯通與中電信市帳率經已跌穿1倍，壞消息出盡而市場當正鐵塔公司分拆無到，如果問在下五十隻藍籌，有邊隻第四季最大機會跑贏大市，諗都唔使諗，古勝實揀中資電訊股。

古勝