Market Insight：短期難破陰乾格局

美國加唔加息呢件事，講咗N咁多年，耶倫撐話今年實加，感覺就好似一對拍拖多年的男女，半推半就都做場大龍鳳滿足吓親朋戚友。

聯儲局加完一次之後，仲有冇下文，古勝就睇得比較悲，事關美國的復甦已經有迹象走到樽頸，第三季業績至今已出得八八九九，標普五百成分股超過一半企業盈利出現倒退，強美元及歐、亞經濟弱過藥煲，對美企營商不利的因素已逐漸浮現，如果加息後美元再向上衝，企業盈利再縮，唔通到時聯儲局又再出新一輪QE？

內地基金愈玩愈縮

上星期大市焦點係財新中國製造業PMI再創六年半新低，證明過去十個月中國出盡法寶，經濟依然未見起色，加埋一次笨拙救市，過往阿爺有形之手無所不能的權威開始受到質疑。

近日古勝與基金友好飯敍已多談風月少談股事，個個都無心戀戰，只望難捱到極的陰乾市可以盡快完結，據聞在內地沽空、沽貨代表對國家有「惡意」的新詮釋之下，人人自危，單向操作下內地基金唔少愈玩愈縮，唔少賓架潛水或者想落香港轉鑊咁話。

港股難越22,000點的雷池半步，繼續行三步退兩步的陰陰乾格局，上周五穿一穿21,000點落到20,957點後拗腰，最後升90點收21,186點。周五夜期早段係威係勢，炒上21,372點比現貨高水186點，最後跌返去21,211點收。

九月期指、期權今日結算，形勢上，實在睇唔到好友有反攻條件，一來周四又再放假，周五有美國就業數據出籠，可能係加息前最重要一個經濟指標。純睇走勢，10日及20日線得而復失，八、九月好友作出過四次嘗試都係無功而還，只怕十月初港股向20,524點上趟低位推進的機會，要比重返兩萬二樓上大。

今年阿里巴巴（美股代號︰BABA）一早開始力谷「雙11」光棍節的促銷活動，講到底都係想再破銷售紀錄同埋幫美國果邊級級落的股價造勢，無奈同內地A股一樣，谷極都谷唔起。上周五阿里股價跌至59.24美元，連跌七日，破埋一年前招股價68美元，並創下上市新低，同上市高位120美元相比，做緊五折大酬賓。

內地經濟大氣候未見底，電子商貿交易量增長都有放緩迹象，近排跌得少的騰訊（00700）都見主席馬化騰連環減持，似乎作為內地股市最後一片樂土的互聯網產業，都漸漸抵受唔住地心吸力，受到熊市影響。

光銀阿媽出手闊綽

內銀泵水補充資本的舉動陸續來，光大銀行（06818）宣布以接近四成二溢價，即每股4.8962元，向主要股東光大集團配售40億股H股，涉資195.85億元，全部用於補充核心資本之用。

在今日唔少內銀市帳率低於1倍PB的情況下，要按不能賤賣國家資產原則，高於1倍PB水平籌旗補充資本，供股及批股出街難度之高唔使多講，倒不如由阿媽豪畀佢好過。但講到底，今次光大集團算十分闊綽，溢價之大也是近年罕見，一來內銀股普遍殘到極，整體市帳率比○九年海嘯時有過之而無不及，衰啲講唔係阿媽出手高，只係阿仔太唔爭氣，況且用阿公錢去彰顯國家對銀行業的支持，在此時此刻，呢少少錢確係值得使。

二線內銀股可吼實

今次批股佔光大銀行擴大後股本7.89%，配售完成後，光大集團持股量由23.96%增至29.96%，有闊佬阿媽出錢出力，光大銀行今日斷估都會升返一浸，但要去到注資價當然難些少，嫌光銀消息見光死想搵類似故事？

本來一級資本較奀，有較大機會需要注資的，仲有農行（01288）及中信銀行（00998），但前者年初佢發咗批優先股出街，短期再伸手機會唔大，至於中信銀行又已準備批畀國家隊中國煙草，都係睇吓整體二線內銀會唔會因消息而有正面反應好過。

古勝