絲絲講場：教細路理財考起伍燕儀
有啲嘢係要自細教落，鋼琴、小提琴、Ballet、畫畫、法文、西班牙文、網球、朗誦呢啲，Sorry，統統唔係。要從細就教嘅，係正確理財觀念。大咗唔識理財，何止仔女後悔，家長肯定更後悔。查實教小朋友理財唔簡單，連湊慣億億聲上落大客嘅Banker一樣考起。
記錄開支同收入
話說花旗銀行搞活動教小學生理財，佢哋環球個人銀行服務香港區總經理伍燕儀（Angel）尋日就教班小學生點記賬，鼓勵佢哋記錄低至少三個月嘅開支同收入，養成習慣。見開大場面嘅Angel竟然話，對住小朋友幾咁緊張，話驚班小朋友聽唔明佢講咩喎。
講開點樣儲錢，Angel話由細到大阿媽教落，要將一半零用錢儲入豬仔錢罌，再加埋每日都好勤力咁做出入帳紀錄。Angel仲話，想儲大錢，一定要識得分邊啲係「需要」，邊啲係「想要」。
話時話，「需要」同「想要」，家長們，你哋自己分得到嗎？