絲絲講場：施穎茵榮升滙豐一姐

帶頭掀按揭減價戰

Diana喺滙豐做咗15年，絲絲最記得係，佢○六年出任亞太區存款及按揭主管，一上任就力推全港最低P按利率，掀起全城按揭減價戰。Diana當年成功幫滙豐重奪畀中銀香港（02388）搶走嘅市場份額。佢大刀闊斧嘅作風，為佢贏得「按揭一姐」稱號，之後喺一一年升任香港區零售銀行及財富管理業務主管。

下月Diana升做滙豐港區一姐，之後Diana將會向滙豐大中華區行政總裁黃碧娟（Helen）彙報。Helen話，好開心亞洲最核心嘅香港區CEO位由Diana坐。

馮姐任港交所董事

絲絲諗番起，馮姐喺一月公布離職，當時滙豐內部同時公布馮姐離任同埋Helen嘅新任命（Helen當時由滙豐中國副董事長、行長兼行政總裁，升上大中華區總裁），市場當時難免會將佢哋兩位嘅去留連埋嚟諗。

依家滙豐人事安排塵埃落定，馮姐近期亦公布做港交所（00388）董事同恒隆地產（00101）獨立非執行董事，乜都叫做告一段落。話時話，滙豐都真係幾旺女將噃。