Market Insight：兼併重組最有炒味

雖然話美國加息可能引起連鎖反應，但經過咁耐時間市場已做好晒準備，象徵式開始加息之後，未來加息步伐相信緩慢。古勝寧願早加好過，消除不明朗因素後隨時一天光晒，如果加息後股市先跌更妙，可部署趁低吸納；而就算受加息最大影響的新興市場，亦寧願早日加息，免得被陰乾式走資折磨。

講番國企改革，之前經已炒到爛，結果方案一公布先走為敬，一來話明冇時間表，二來願者上釣，即係做唔做及幾時做，話事人係總經理，而非總理。其實國企改革，要做的自然會做，而叫部分官員放棄權力難過登天。有位紅籌老總亦氣憤表示，做官的做官，營商的營商，以做官的角度去營商，國企管治質素自然低落。

資產整合帶來憧憬

國企改革始終係好事，但從管治着手卻是非常長遠的事情，股民只爭朝夕，何況驚住管治質素提高不及中國經濟衰落般快。股民最歡迎的肯定是兼併重組，因為最快見效，「神車」及「神船」是最佳例子。中鐵（00390）亦相當識做，嗱嗱臨公布與子公司中鐵二局（600528.SH）搞資產整合，兩間上市公司加埋幾千億資產，總有一些資產可以整合，但同個仔搞整合不及同阿媽搞注資有着數。

雖然國企改革方案已塵埃落定，但有重組概念之股份仍有得炒，未來先睇中遠系同中海系復牌有幾大搞作，但點都難同中車（01766）媲美。

A股除個別如招行A股（600036.SH）負起托市任務，以及中鐵建A股（601186.SH）掹中鐵車邊之外，其餘相當慘情，滬綜指跌2.67%再向3,000點進發，但重災區是深成指跌6.55%，創業板瀉7.5%，再有千股跌停板。封殺股指期貨、完成配資強制平倉、熔斷機制等效應又完全蒸發，但A股繼續「冇得估」，不玩是上策。

消費市道仍難樂觀

星期日公布的內地經濟數據未算好差，零售數據甚至好過預期，可以解釋為內地股市急插，股民埋單計數後重返消費市場，但另一問題是經濟數據隨時為政治服務，在現時領導人一致唱好經濟底下，數據表現不能摑領導人一巴。睇番上市公司表現最實際，百麗國際（01880）截至八月底止次季度鞋類同店銷售下降7.7%，搞到股價唔見7%；「鞋王」都唔掂，其他零售股亦唔慌好得去邊，其實周日去步行街一看就知情況。

昨日跌得最傷係券商股，表現較佳是汽車股，八月份乘用車銷量下降3.4%已算好消息。陸路交通除了養車、坐公交及計程車外，現時多了Uber這個選擇，內地則有神州租車（00699）。

集團上半年收入和純利分別升24%和87%，截至六月底總車隊達8.4萬架，而增長主要來自今年一月與優車科技合作組成「神州專車」，主打白領及高端市場，亦類似香港的Uber路線，但內地的Uber則攻低端市場。

神州租車現時短租平均日租為277元人仔，出租率約為63%，低於國際75%及同業70%的水平，但管理層認為未來提高出租率亦可同時帶動毛利率。不過，內地監管環境的不確定性，為集團帶來隱憂。Uber只是向合作司機抽佣，但神州租車花費龐大的金錢去買車。

飛機租賃走勢不俗

飛機亦有得租，中國飛機租賃（01848）今年上半年收入及純利分別上升47%及85.8%，集團機隊規模有50架，除與內地航空公司合作之外，亦先後與印度、澳門、歐洲及土耳其客戶簽訂飛機租賃協議或意向書，目標是至二○二二年擁有168架飛機規模。

買飛機要用美金，但集團認為人仔貶值對其影響甚微，原因是大部分租賃合約及貸款亦用美元，只有4份租約以人仔計算。集團計劃發展多種增值服務，包括機隊規劃諮詢、結構租賃、飛機買賣及再營銷以及飛機拆解，今年七月投得哈爾濱一幅土地以興建拆解中心，首期預算於一八年竣工。飛機租賃與大部分中資股走勢相同，急升、急跌、但近期走勢逐步回升，畢竟增長較有保證，風險亦較低，今年預測市盈率不過9倍左右。