孖妹Ｓ檔案：避開估值陷阱 撈貨進修班
港股連跌幾個月，恒指目前市盈率只得約九倍，國指市盈率更低至不足七倍，計估值便宜，喺環球市場可算數一數二，引得孖妹轉季買減價衫之餘，都想喺股場執平貨。為免又再撈底變坐艇，孖妹決定請教幾位專家，點樣可以避開估值陷阱，買到啲真正價廉物美嘅筍股。
選股策略知清楚
植：耀才證券市場研究部經理 植耀輝
止：人氣財經網誌作者 止凡
簡：華富嘉洛證券資產管理副總裁 簡志健
彩兒：我都有學股神巴菲特o架，喺眾人恐懼時貪婪、趁低吸納吖嘛，但點解我撈親啲股都係沒有最低、只有更低，搞到最後一手蟹貨？
Kitty：你淨係睇市盈率（P/E）同市帳率（P/B），見呢兩個比率低就覺得抵買，梗係容易中伏啦。
估值低未必值博
植：股份估值低，可能係因為佢哋增長慢或者盈利下跌，並不代表一定值得買入。好似市盈率只有四倍幾嘅內銀股，部分喺最近公布嘅中期業績錄得近乎零增長，不良貸款又升。現時內銀嘅撥備覆蓋率好低，未來唔排除有機會減少派息，對投資者嘅吸引力會進一步減少。又例如本地地產股，佢哋現時嘅市帳率都少於一倍，股價相對每股資產淨值（NAV）有幾十個百分點嘅折讓，其中一個原因係地產公司嘅土地同物業會隨樓價升跌改變，而市場正預期樓價會喺未來下滑。
止：投資者可以睇吓公司年報，了解佢地嘅營運模式，同埋盈利、股本回報率（ROE）、毛利率等營運數據，再對照估值指標做分析。例如市帳率應該同股本回報率一齊睇，假設一間公司將擁有嘅地皮放喺度曬太陽，唔用嚟起樓賺錢，反映公司利用資產淨值嚟產生純利能力嘅股本回報率自然會較低，因此市場給予公司每股帳面價值（即資產淨值）一個較低嘅價格，即市帳率較低，亦屬合理。相反，港交所（00388）靠已有嘅交易系統就能賺取交易費，不需投入好多資本以獲取盈利，股本回報率自然高，因此市帳率可高達10多倍。
選股比較同行業
彩兒：止凡，我聽講你嘅投資回報都幾令人葡萄喎，你係咪偷雞收埋咗條絕世估值Formula，計到個必賺嘅買貨價位呀？
止：我覺得衡量股票估值似藝術多於科學，難有劃一標準界定點樣嘅公司值得有某個估值，投資者可以透過比較相同行業嘅公司，搵出邊間管理同埋經營出色，趁周期調整低價買入。
例如將同喺香港經營化妝品店嘅莎莎國際（00178）同卓悅控股（00653）比對，就會發覺莎莎嘅營運策略、負債控制、毛利率都明顯優勝。卓悅曾經配售股份集資買舖，而非好好擴充業務，店內售賣嘅貨品種類亦較雜亂，比對之下就會發覺莎莎營運好出色。以往莎莎嘅市盈率高達20多倍，依家受內地個人遊旅客消費減少拖累，市盈率跌至約10倍，真係眼前一亮，我覺得值得吸納，道理同巴菲特喺○八年嘅金融海嘯之後大手買入估值低殘嘅優質金融股同出一轍。
Kitty：人人都講到香港零售市道死得，你真係唔驚？
止：內地個人遊旅客數目的確有所減少，但經濟真係出事，政府自然會做嘢，一切都有周期，散戶應把握喺周期底部買入優質公司。我買股票前會親身到相關嘅店舖視察，了解實況，以更準確掌握公司嘅營運情況。散戶選股貴精不貴多，寧可深入研究幾間自己熟悉嘅公司。
彩兒：投資真係唔同買衫，要睇多啲嘢先分到平定貴，睇嚟我要少啲shopping，花多啲時間先可以炒股賺到錢喇。
睇實市盈率區間
簡：一般散戶都唔識或者冇足夠數據運用複雜嘅估值模型，計出一隻股份嘅內在價值，從而決定係咪抵買，簡單啲嘅做法係參考股票嘅市盈率區間。一啲股票嘅市盈率比較穩定，過去都喺特定嘅區間橫行上落。若呢啲股票嘅市盈率低於嗰個區間嘅中間位置，估值可被視為低於合理水平，值得吸納。
要留意嘅係，呢個方法只適用於市盈率較穩定嘅股份，當令股份市盈率穩定嘅因素消失，佢就唔再適用。以濠賭股為例，自內地嚴厲打貪後，佢哋嘅盈利增長快速放緩，經營環境突轉困難，市盈率急速向下，以市盈率區間呢個方法去衡量佢哋是否抵買再唔適合。又好似內地燃氣股咁，過往一般有20多倍P/E，咁係因為內地嘅燃氣使用率唔高，有好大增長空間，但燃氣要同石油競爭，油價自去年下跌，為燃氣公司帶來好大的衝擊。石油價格疲弱係結構性問題，燃氣股可否維持過往嘅Organic Growth（通過公司現有資產及業務實現的增長）屬未知數。
Kitty：六月嗰時恒指嘅市盈率表面都係幾低，但唔少港股嘅市盈率都已超出固有嘅區間，唔怪得你急急沽貨套現啦！
簡：我認為內地電力股屬目前較「抵買」嘅股份，原因係佢哋嘅估值相對低，加上佢哋負債高，可望明顯受惠中央減息，而煤價下跌亦有助佢哋提升毛利率。仲有呀，內地電力股嘅息率一般有4至5厘，亦有可能受惠國企改革。
學識參考估值指標
講親估值，通常第一時間都係諗到P/E同P/B，其實仲有好多其他唔同嘅估值指標，佢哋各有好處同缺陷，投資者不妨參考多幾個指標，以對公司有較全面嘅評估。
CAPE：的英文全寫為Cyclically Adjusted Price-to-earnings，意即經周期調整市盈率。此指標的計算方法為將經通脹調整的股價，除以經通脹調整的過去十年平均盈利，消除經濟周期影響。
P/EV：是股價相對內涵價值（Embedded Value）的比率，多用來評估保險股的估值。內涵價值的計算複雜，簡單可理解為保險公司的保單收入愈高、賠償金額愈少、投資回報愈高，內涵價值便會愈高。
PEG：為本益成長比率，計算方法為將市盈率除以某段時間或預測盈利增長率，一般認為PEG的合理值為1。
P/SALES：即市銷率，是股價與上年度或季度每股營業收入的比率，好處在於可套用在錄得虧損的公司，因為它們並沒有市盈率，而營業收入亦較盈利難操縱。
EV/EBITDA：又稱企業價值倍數，當中的EV（Enterprise Value）為市值+負債-現金，EBITDA為未扣除利息、所得稅、折舊與攤銷前盈利，比率用以反映公司市場價值與收益的關係。
若有料報畀彩兒同Kitty或有嘢問，可電郵money.biz@on.cc
Kitty、彩兒