Market Insight：落後內房只宜短炒

大市昨日由頭升到尾，恒指最多升過969點，收市升872點收報22,131點，挾淡之下，主板成交增加至1,154億元，全日共89隻熊證被收回。說句老實話，過去兩日整體大市的基本因素其實沒有大轉變。

八月份數據顯示，中國出口經濟依然不振，在大宗商品價格疲軟以及內需不足下，就連進口情況也令人難以樂觀，基本是沒有多大理由去支持睇好中資股份，純粹是傳統基金以至對沖基金，現金水平根本已經相當高，亦在衍生工具做到全面，甚至為跌市做「凸」了套戥，結果挾倉一開始，不能不加入追貨。

議息過後方見真章

七月股災加埋中國粗暴救市不果，依家街外有參與A股的芬佬，十個有九個睇淡，見A股長期只係有波幅無升幅，剩低嗰一個甚至摺埋唔玩。估唔到前晚巴菲特接受美國電視專訪時唱好中國，認為北京反貪腐見成績，而且這世界第二大經濟體經已搵到世界大國成功的要訣，長遠值得睇好，確係估佢唔到。

不過，古勝認為大家實在唔應該對股神睇法看得太認真，反正齋吹又唔使錢，事實上，股神除N年前食胡的中石油（00857），以及仲持有的比亞迪（01211）之外，多年來鮮有真金白銀到華投資，講同做明顯係兩回事。

反而，佢提到美息，就有啲參考價值。老人家預期美國長期經濟增長大約維持百分之二，只算係不慍不火，唔講得差，唔算太火熱，認為美國利率假如遠高於歐洲，會對出口構成不良影響。展望下周二、三聯儲局一連兩日議息，委員們會唔會聽吓老人家意見？利率期貨顯示，九月加息機會率只係稍高於三分之一，八成機會仲係留番十二月至出手。但幾可肯定是，港股過去兩日挾得幾勁都好，下周美國議息前，多少會投鼠忌器，只怕指數返回兩萬二樓上，可能要牛牛皮皮幾日之後，先會見真章。

電動車銷情受考驗

講開比亞迪，近排汽車股紛紛見到報復式反彈，傳統生產內燃機引擎汽車廠商升到甩轆，皆因多間車廠的八月銷售數字，按年跌幅比大行估計細，有多少復甦味道。當中估值最低最值博應該首選吉利汽車（00175）同長城汽車（02333）。

值得留意，八月新能源汽車產量逆市狂升近4倍，比亞迪固然係芬佬本地唯一之選，不過實在令人懷疑，今日低油價之下，推銷新能源車會唔會好似逆水行舟，阻力愈來愈大。

早排在下於香港試駕比亞迪電動車，撇開個樣輸蝕比差幾萬蚊的寶馬i3，以至唔算靚仔的日產Leaf，操控各方面觀感都好麻麻，個人就完全無打算加入做環保先鋒的衝動。

早排個市日日插，無乜好買走去問私人銀行賓架，攞份高息債列表參考參考，基於個市對中國減息預期不斷升溫，加埋個個睇死阿爺唔會比內地樓市出事，唔睇尤自可，見到唔少信貸評級垃圾級別的內房債券居然得個6至7厘，可以話離晒大譜地低。

富力同世房博得過

老老實實，如果出到7厘唔夠走去博BB級以下垃圾債，倒不如5厘幾6厘買番幾間有名有姓的跨國大銀行永續債券，博聯儲局唔加到幾多，索性收息度日。不過，話說回頭，既然班高息債玩家當正堆內房企業至少未來三幾年一定唔會出事，可以如期還到錢畀債券投資者，咁依家殘到死的內房股，至少短期有錯價之嫌，大大聲細細注一試無妨，短炒二線內房，睇來睇去以富力地產（02777）及世茂房地產（00813）最啱嘴形。

繼長實地產（01113）的重組分拆，輪到長江基建（01038）和電能實業（00006）宣布合併，一四年初電能拆出港燈（02638），被視為長和系睇息升，在yield player減磅，今日終於行多步，將資源歸納長建，無疑是趁美元強，歐、澳、加、紐大把平嘢執而鋪路，長和系的世紀重組也隨着最後的合併，應該進入尾聲。

古勝