碧瑤（01397）主席吳永康（Ben）尋日同傳媒飯敍，一坐低就問，突發記者做啲咩、點輪更、返工時間幾長……原來係廿四孝阿爸幫囡囡收風。
事關Ben個囡囡今年16歲，出年先考DSE，不過已經目標清晰，想入新聞界咁話，仲想做戰地記者添！去敍利亞？Ben話自己一聽到，反應係「唔係啩」。擔心係自然，但囡囡咁有大志，好多爸爸恨都恨唔到。
話時話，呢位爸爸好似收錯風喎，雖則好多突發都想做或以為自己係戰地記者，不過就……不如叫囡囡睇吓行家張翠容嘅書，了解下「戰況」先。
余絲韻