絲絲講場：李祿龜速申報學足股神
被喻為「股神接班人」嘅李祿，原來真係盡得巴菲特精髓，精於「撈底」外，連「走灰色地帶」都學到足。李祿上月大手增持中車（01766）到「浮面」後，竟然喺美國寄信嚟港交所（00388）申報，足足遲咗成半個月，學足巴菲特○七年沽中石油（00857）申報手法。對住中車近日突然反彈，小股民就得個望字。
寄掛號披露增持中車
港交所發言人證實，李祿嘅申報文件喺美國寄出，以掛號信形式喺本周二寄抵港交所，港交所已經即時處理仲尋日上網。呢個披露漏洞，證監會正在處理中喎。
港交所資料顯示，李祿管理嘅對沖基金喜馬拉雅資本，八月二十四日喺場內買入2,323.6萬股中車，平均每股8.519元，涉資達1.979億元，持股由過去「暗手」嘅4.83%，增至5.36%嘅須披露水平。到尋日真正「披露」到出嚟畀公眾對眼睇到，已經爭咗17日！
事隔八年 漏洞依然
而中車尋日尾市突然抽高，收報9.2元，李祿帳面勁賺8%，賺成1,582萬元，而且消息未來有可能再刺激中車股價添。
仲記得，巴菲特嘅投資旗艦巴郡○七年分多次清倉中石油，亦係由美國寄平郵畀港交所嚟申報，個漏洞當時一曝光，監管機構仲解釋話，只要喺增減持三日內以郵寄、傳真或電郵方式向交易所申報就得，所以巴郡並無違規。電郵咁普及，當時睇，條例都已夠晒落後，事隔八年，到依家證監會仲未堵塞到呢個低級漏洞！
大鱷股神最愛冧市
你都想學番一招半式？得。先聽吓股神同大鱷解釋點解你會輸股票。
Omega Advisors主席Leon Cooperman話，佢同巴菲特成長時嘅世界，股價跌，就入多啲貨；但依家就因為啲電腦程式交易，搞到個市超Chok，市場基礎反轉晒，股價愈升啲人愈買，愈跌就愈拋，Common Sense唔知去咗邊。
對於市Chok，巴菲特何止無有怕，佢仲話歡迎市跌，事關咁先有機平入佢心儀愛股。佢仲話，個市有時Chok到依家咁，亦有時悶到想瞓，但記住重點係睇長線啲，幾長？5至10年咁啦。
嗱，人哋「股神接班人」都係咁學番嚟，做唔做到，睇你自己。
余絲韻