孖妹Ｓ檔案：Tom McClellan神乎其「技」

連續兩年獲得好評

TM：美國技術分析師　Tom McClellan

彩兒：其實我日日都估中恒指唔升就會跌啦，呢位大師有乜咁勁先？

Kitty：佢曾經喺二○一一同一二年被Timer Digest評為最佳市場預測者（Market Timer），今年上半年喺股市、債市及黃金嘅市場預測排行榜都進佔首五位。佢早喺今年四月留意到美股嘅漲跌趨勢線（Advance Decline Line）有所轉弱。漲跌趨勢線係一個統計上升同下跌股票數目比例嘅技術指標，用嚟確認大市方向；一般嚟講，當指數上升係由愈來愈小數目嘅股份帶動，大市好大機會將會轉勢向下。被視為經濟走勢領先指標嘅運輸股整體亦有下跌嘅趨勢，呢啲訊號同二○○○年科網股見頂前嘅情況十分相似。另外，佢喺二○一○年發現可以從歐洲美元期貨合約淨倉嘅走勢預測標普500指數一年後嘅走向。綜合各種技術指標，就作出美股會喺八月二十至二十六日期間出現大跌嘅預測。

反彈過後料見跌浪

美股果真喺八月二十四日經歷咗「黑色星期一」，道指當日一度大挫過千點，道指同標普500指數喺二十至二十六日期間分別累跌咗6.13%及6.69%。真係忍唔住叫你一聲股壇神算呀！

T M：其實美股早前大跌期間，VIX（芝加哥期權交易所波動指數）升至明顯高於VIX期貨價格，顯示美股出現嚴重超賣，呢樣係我意料之外。我依家預測美股會從上星期三開始出現七至八日嘅反彈，市場會因而傾向相信美股走勢已經轉好，屆時卻會係新一輪跌浪嘅開始，正式進入熊市，一直至下年四月先會見底。目前應該捕捉呢個短線反彈，然後一直沽空至下年。

歐洲美元期貨淨倉走勢領先標普500指數

今年標普500指數與07至08年走勢

美國經濟走向衰退

彩兒：熊市？！點解嘅？人人都講緊美國經濟復甦，我仲喺標普500指數七月創新高嗰時高追咗（嗚嗚嗚）......Kitty就只炒港股，但美股差，港股都無運行啦。

T M：美股呢次進入熊市源於市場流動性問題，同過度增長有關，而非即將加息呢個因素。其實聯儲局早就應該加息，長期將息率維持喺接近零嘅水平，阻礙咗經濟周期嘅自然發展；市場成日期望聯儲局可以解決所有問題，但冇可能囉。

依家市場普遍相信美國經濟正逐漸復甦，但大多數人所相信嘅嘢通常都同現實相反，美國經濟事實上正走向衰退。冇咩人留意到木材期貨價格年內都幾低，意味建造房屋同其他經濟活動將會好疲弱。另外，美國政府嘅稅率太高，喺經濟體系抽去太多資金，窒礙咗經濟發展；依家聯邦稅收佔整體國民生產總值嘅比率升至近18%，從過往嘅數據睇嚟，每當聯邦稅收佔GDP升至18%嘅水平，經濟都會陷入衰退。

期油透露美債走向

Kitty：大師嘅睇法真係好獨到喎。咁你又點睇美債同金價呀？

T M：我發現美國30年期國債孳息率嘅走勢較期油價格滯後三個星期，換句話可以從期油價格嘅圖表預測美國30年期國債孳息率嘅走向。兩者嘅走勢相似係有道理嘅，因為低油價會令通脹減低，而通脹正正係債價嘅敵人。至於點解兩者存在三星期嘅滯後期？我諗呢個係一個極好嘅謎。金價走勢就有歷時13.5個月嘅周期，喺今個月見咗底喇，依家進入上升嘅階段。

彩兒：我知你用嘅係適時進出投資法（Market Timing），即透過分析技術指標，預測市場走勢，做到低買高沽，其實我都有睇吓技術圖表，點解你估市估得咁準，我就成日高追坐艇？

T M：隨着資訊愈來愈流通，投資者對市場資訊嘅反應速度遠遠快過以前，加快咗好多周期，獲利機會會喺短時間消失。成功預測市場走勢嘅關鍵在於可以放低唔Work嘅方法同埋發掘人哋冇留意嘅嘢。好多人都忽略量度市寬（上升及下跌股票數目比例）嘅技術指標，歐洲美元期貨合約淨倉同美股嘅關係亦係其他人冇留意，但我就有睇喇。作為一個科學家、經濟學家或者技術分析師，去驗證自己相信嘅係十分重要嘅一步。技術分析呢門學問吸引嘅地方在於可以幫人賺錢，而它又好似一個智力遊戲，當中嘅規則會不斷轉變，參與嘅人要不斷適應玩法。

試過研究太陽粒子

T M：其實除咗一般嘅技術指標，我仲研究過太陽粒子、天氣等因素同金融市場嘅關係。我最初研究太陽粒子同天氣嘅圖表，係想證明畀自己睇呢啲因素同金融市場並冇關係，但之後發現佢哋好似真係有關聯，雖然關聯性就弱咗少少。其實天氣會影響農作物嘅生長，從而影響佢哋嘅價格同通脹率，所以同金融市場有關唔出奇。

一股迪士尼悟道理

Kitty：我完全感受到你對預測市場趨勢嘅熱情呀。究竟係點樣練成呢?

T M：我父母Sherman McClellan同Marian McClellan好早已經開始研究技術分析，發明咗技術指標McClellan Oscillator（MCO）。我自小就開始接觸投資同價格走勢，細個嘅時候不時會去迪士尼樂園玩，六歲嗰年父母就送咗一股迪士尼（美股：DIS）股份畀我。擁有一股迪士尼令我明白到價格會變動，我嘅財富亦因而會有上落。嗰時迪士尼股東呢個身份，令我覺得自己好重要，媽媽見我咁自大，就潑我冷水，話畀我聽其實一股股份屬微不足道。我長大後就將嗰股迪士尼賣咗，原本40美元嘅資金增值至400美元，等我可以買到架電單車。

父子檔搞報告生意

T M：我八十年代入咗美軍做直升機師，期間真正開始對父母嘅技術分析工作產生興趣，一九九三年離開美軍，兩年後同爸爸合作經營向客戶提供市場研究報告嘅生意，以父子檔捕捉適時進出市場嘅時機。

我覺得自己擁有全世界最好嘅工作，因為既可以無時無刻留意市場發生嘅事，又可同其他人分享自己嘅諗法，非常有滿足感。

Kitty：分享到你嘅諗法，我都覺得好滿足呀。

若有料報畀彩兒同Kitty或有嘢問，可電郵money.biz@on.cc

Kitty　彩兒