最近見親嘅都係智能跑鞋，浩沙（02200）下個月亦會喺北京推出佢哋第一批智能運動產品，不過，裏面係無鞋嘅！
浩沙今次推嘅係智能運動女性內衣、健身腰帶、同埋男女都啱用嘅運動背心。之後仲有大把花款，好似智能健身服飾或配件同其他生活用品咁，董事長施洪流仲話，連智能啞鈴、泳帽都準備好晒。
咦，智能泳帽？施洪流只肯講，出年嘅智能泳帽預埋小朋友，預算會有測距功能，超出某個距離就會發出訊號，等啲家長唔驚小朋友游出安全範圍。
估唔到講講吓，施洪流啲創意湧住出嚟，話智能泳帽加埋「自救」功能就肯定大賣咁話。睇嚟，浩沙新任CFO對智能產品嘅研發投入可能要計過條數。
余絲韻