絲絲講場：梁太忙供股 騰足8000步
創銀（01111）星期一出業績兼宣布供股，副主席兼董事總經理梁高美懿（梁太）除咗做到無停手，仲騰來騰去無停腳。
話說梁太戴住乖女送嘅智能手帶，雖然同當日主持業績會嘅造型風格有少少出入，但都好乖咁戴住，夜晚喺手機Check番吓，一日究竟行咗幾多步。
撐創銀供股價「好抵」
神奇嘢嚟喇。梁太全日喺創銀大廈入面居然行出咗8,000步呢個驚人數字。絲絲唔信，尋日特登去實地視察，由中環地鐵站D2出口去創銀大廈28樓，最多120米，畀盡來回都係得400步咋喎……
原來，梁太話自己平日兩層樓以內都會揀行樓梯，嗰日騰上騰落開股東會同董事會，夜晚仲要陪個孫玩，騰完一輪已經夠晒運動。
不過供股咁大件事，又難怪梁太騰到冇停腳，畢竟小股東可能要計掂數先供。梁太就話，其實供股價17.05元……都好抵喇。
揸中銀 望有特別息
咁係咪有得炒收購南商先？梁太就答唔到，不過佢自己作為中銀香港（02388）小股東，就希望如果出售南商可以帶挈自己有得收吓特別息，因為前排好唔容易等到恒生（00011）賣興行，點知說好的特別息都仍未見影。
余絲韻