滬綜指昨受制於4,000點關，話係周五期指結算前的例牌震盪。查實對投資者而言，炒作都離不開值博率，既然呢刻個市未有足夠動力向上衝，就惟有掉頭再試政策底先有得玩。唔想加入淡友行列，最多忍忍手，千祈咪對着幹。
環顧魚缸現象，唔少股份股價正下試七月低位。就如iPhone概念股高偉電子（01415），一度甚得芬佬歡心，今年五月股價曾高見8.85元，昨日股價一度失守4元關，見番上月八日低位3.99元，收市跌12.4%報4.07元，高位計市值唔見一半有多了，唔肯斷臂呢刻真係肉赤。
如今大家面對的問題係，雖然國家隊所持的官股唔會在短時間內流出市場，但大家都知滬綜指4,500點頂到實，在4,000點邊入場博的動機幾乎係零。
再看金、股、匯市，利淡的消息較多，向下質低再玩過係正路。即使昨日人行加大逆回購規模，又盛傳國企改革會有新消息，但投資者還是以退為進，沽貨套現走人。總而言之，魚缸兵荒馬亂，如今大家都要珍惜銀彈，保留實力，等候嚴重超賣再次出現，再作部署。
個股方面，昨日見香港中旅（00308）股價表現硬淨，高位見3.26元，收報3.24元，升4.8%，成交7,331萬元。截至去年底，中旅手頭淨現金有24.59億元，相等於每股0.44元，現價往績市盈率10倍，息率3.7厘，論估值確具防守力，而市場一直憧憬央企改革下，年內中旅會獲母公司注資，亦加強股價抗跌力。
不過，市況疲弱下，即使睇中心水股打算作中長線投資，要做定最壞心理準備，提防一旦出現極端跌市，股價有機會再試上月低位在2.88元。
另一方面，現時其10日線（3.08元）有勢重上50日線（3.18元），若確認出現黃金交叉，較大阻力在3.8至4元水平。
司慕渢